नाटकीय पेनाल्टीमा म्यानचेस्टर युनाइटेडलाई हराउँदै भिल्लारियल बन्यो युरोपा लिग च्याम्पियन

एजेन्सी । म्यानचेस्टर युनाइटेडका गोलरक्षक डेभिड गी जिया पेनाल्टीमा चुक्दा स्पेनिस टोली भिल्लारियलले क्लब इतिहासमा पहिलोपल्ट युरोपेली ट्रफी जितेको छ ।

पोल्याण्डको डान्स्कमा खेलाइएको युरोपा लिग फाइनलमा निर्धारित र अतिरिक्त ३० मिनेटमा पनि दुवै टोलीले एक-एक गोलको बराबरी खेले । त्यसपछि भएको पेनाल्टी शुटआउट झनै नाटकीय रह्यो ।

पेनाल्टीमा भिल्लारियलका सबै ११ जना खेलाडीले गोल गरे तर, युनाइटेडका गोलरक्षक डी जिया अन्तिममा चुके । २१ जनाले पेनाल्टीमा गोल गरेको खेलमा डी जियाको पेनाल्टी भिल्लारियलका गोलरक्षक गेरोनिमो रुल्लीले रोकिदिए ।

युरोपेली प्रतियोगिताको फाइनलमा मैदानमा उत्रिएका सबै खेलाडीले पेनाल्टी प्रहार गर्नुपरेको यो पहिलोपल्ट हो । यो भिल्लारियलको पहिलो ठूलो उपाधि पनि हो । आर्सनलका पूर्व प्रशिक्षक उनाइ इमरेले स्पेन गएयता भिल्लारियलको आमूल परिवर्तन गरेका छन् ।

यसअघि नियमित समयअनुसार खेल सुरु भएको २९ औं मिनेटमा मोरेनोले गोल गरेपछि भिल्लारियल पहिलो हाफमा अगाडि थियो । दोस्रो हाफ सुरु भएको १० मिनेटपछि इडिन्सन काभानीले गोल गरेपछि खेल बराबरीमा आयो ।