बाइडेनद्वारा कोरोना उत्पतिबारे छानविन गर्न निर्देशन, चीनले भन्यो – राजनीतिकरण नगरौं

वासिङ्टन । दुई दिनअघि प्रमुख अमेरिकी चिकित्सा सल्लाहकार डा. एन्थोनी फाउचीले कोरोनाभाइरलाई मानिसले उत्पति गरेको भन्ने कुरा स्वीकार्न आफू तयार नरहेको बताएका थिए ।

अमेरिकी राष्ट्रपति जो बाइडेनले खुफिया एजेन्सीलाई ९० दिनभित्र भाइरसको उत्पतिबारे स्पष्ट तथ्य पत्ता लगाउन निर्देशन दिएका छन् ।

चीनले बुझेरै भाइरस फैलाएको हो वा त्यहाँको प्रयोगशालाबाट चुहावट भएको हो भन्ने तथ्य पत्ता लगाउन राष्ट्रपतिले निर्देशन दिएका हुन् ।

बाइडेनले एक वक्तव्य जारी गर्दै पुनः एकपटक भाइरस उत्पतिको तथ्य र सूचना संकलन गर्न भनेका छन् । संक्रमित व्यक्ति पशुसँगको सम्पर्कमा आउनुभन्दा पहिले नै भाइरस फैलिएको हो वा ल्याबाट बाहिरिएको हो भन्ने तथ्य आउनु जरुरी रहेको जनाइएको छ ।

बाइडेनले जाँचका लागि सहयोग गर्न चीनलाई आग्रह गरेका छन् । केही दिन पहिले अमेरिकाको वाल स्ट्रिट जर्नलमा प्रकाशितमा उल्लेख भएअनुसार २०१९ को नोभेम्बरमा वुहान प्रयोगशालाका तीन शोधकर्ताले उपचारका लागि आफूलाई अस्पताल भर्ना गर्न आग्रह गरेका थिए ।

अमेरिकास्थित चिनियाँ दूतावासले बुधबारै एक वक्तव्य जारी गर्दै भाइरस उत्पतिलाई लिएर राजनीतिकरण नगर्न भनेको छ । उसले अमेरिकासहितका पश्चिमा मुलुकले यसबारे ‘षड्यन्त्रको सिद्धान्त’लाई पछ्याइरहेको समेत दाबी गरेको छ ।