जेठ २४ मा बजेट अधिवेशन आव्हानका लागि प्रदेश २ सरकारको सिफारिस

जनकपुरधाम । प्रदेश २ सरकारले चालु पाँचौं अधिवेशन अन्त्य गरी बजेट अधिवेशन आह्वान गर्न प्रदेश प्रमुख डा. राजेश झा ‘अहिराज’ समक्ष सिफारिस गर्ने निर्णय गरेको छ ।

आज बसेको प्रदेश मन्त्रिपरिषद्को बैठकले जेठ २४ गते बजेट अधिवेशन आह्वानका लागि प्रदेश प्रमुख समक्ष सिफारिस गर्ने निर्णय गरेको आन्तरिक मामिला तथा कानून मन्त्री ज्ञानेन्द्र कुमार यादवले जानकारी दिए ।

गत चैत ३० मा पाँचौं अधिवेशन सुरु भएको थियो । पाँचौं अधिवेशनको दोस्रो बैठक वैशाख १० मा बस्यो तर तेस्रो बैठक वैशाख १४ गतेका लागि आह्वान गरिएपनि अन्तिम समयमा स्थगित गरियो ।

कर्मचारीमा कोरोना संक्रमण देखिएको भन्दै प्रदेशसभा बैठक स्थगित गरिएदेखि पुनः बस्न सकेन । प्रदेशसभा बैठक लामो समयदेखि नबस्दा प्रतिपक्षी दल सरकारको आलोचना गरिरहेका छन् ।