नेपाल स्काउटले पनि थाल्यो कोरोना संक्रमितको शव व्यवस्थापन (भिडियो)

काटमाडौं । नेपाल स्काउटले सोमबारदेखि कोरोना संक्रमणबाट मृत्यु भएकाहरूको पनि शव व्यवस्थापन गर्न शुरू गरेको छ ।

यसअघि कोभिड -१९ संकट व्यवस्थापन केन्द्र (सीसीएमसी) ले कोरोना संक्रमणबाट मृत्यु भएकाहरुको शव व्यवस्थापन गर्ने जिम्मा नेपाली सेनालाई दिएको थियो ।

कोभिड- १९को संक्रमणबाट मृत्यु हुने संख्या बढेसँगै शव व्यवस्थापनमा पनि चुनौती थपिएको थियो । शव व्यवस्थापनमा सहजीकरण गर्न लागि आजदेखि स्काउटले संक्रमितको शव व्यवस्थापन गर्न शुरू गरेको स्काउटले जनाएको छ ।

मोरङको विराटनगरमा आज नेपाल स्काउट प्रदेश तदर्थ समितिका संयोजक रवि खनालको नेतृत्वमा नेपाली सेनाबाट तालिम प्राप्त स्काउटरहरूको टिमले संस्थागत रूपमा पहिलोपटक कोभिड- १९ बाट संक्रमण भई निधन भएका विराटनगरका ५४ वर्षीय पुरुषको शव व्यवस्थापन गरेका छन् ।

यसअघि नै संक्रमितको शव व्यवस्थापनका निम्ति प्रदेश १ का झापा, मोरङ र सुनसरी जिल्लाका ४२ स्काउटरलाई नेपाली सेना पूर्वी पृतना हेडक्वाटर र नम्बर २ बाहिनी अड्डा, हिलेले तालिम दिएको थियो ।

स्काउट प्रदेश कार्यालयका प्रदेश अधिकृत नवराज घिमिरेका अनुसार बेलबारी,रङेली, धरान, दमक, बिर्तामोड र भद्रपुरमा पनि स्काउटले शव व्यवस्थापन गर्ने तयारी भइरहेको छ ।

शव व्यवस्थापनका लागि खटिएका स्काउट स्वयंसेवकहरुलाई अलग्गै बस्ने व्यवस्था गरिएको पनि घिमिरेले बताए । कोभिड-१९ महामारी लाई लक्षित गर्दै स्वास्थ्य परामर्श प्रदान गर्ने उद्द्श्यका साथ डाक्टर अन कल हेल्पलाईन सेवा पनि संचालनमा रहेको छ ।