प्रदेश २ मा पदमुक्त माओवादी साँसदको पक्षमा अन्तिरम आदेश भएन

जनकपुरधाम । नेकपा (माओवादी केन्द्र)ले पदमुक्त गरेको प्रदेश २ का तीन साँसदको पक्षमा सर्वोच्च अदालतले अन्तरिम आदेश दिन अस्वीकार गरेको छ । साँसदबाट हटाएको झण्डै डेढ महिनापछि जेठ १३ गते रामचन्द्र मण्डल, मोहम्मद समिर र कुन्दन प्रसाद कुशवाहाले सर्वोच्चमा रिट निवेदन दर्ता गराएका थिए । तर अदालतले अन्तरिम आदेश नदिएपछि उनीहरु तत्काल साँसद पदबाट बञ्चित नै रहने भएका छन् ।

सर्वोच्च अदालतले नेकपा विघटन गरेर नेकपा एमाले र माओवादी व्यूँताएपछि मण्डल, समिर र कुशवाहासँगै ज्वाला साह एमालेमै बसिन् । उनीहरु भने माओवादी केन्द्रबाट निर्वाचित भएकी थिइन् । सोही कारण माओवादी केन्द्रले चारै जनालाई पदमुक्त गरे । पदमुक्त भएकी ज्वालाले भने सर्वोच्चमा रिट दिएकी छैनन् । मण्डल, समिर र कुशवाहाले एमालेको विभिन्न पद ग्रहण गरिसकेका छन् । यद्दपी उनीहरु माओवादीमै रहेको दावी सर्वोच्चमा हालेको रिट निवेदनमा दावी गरेका हुन् ।

सभामुख समक्ष राजीनामा पनि नदिएको, संविधानको धारा १७८ बमोजिमको योग्यतामा पनि विवाद नरहेको, प्रदेश सभामा अनुपस्थित नरहेको र दल त्याग समेत नरहेको उनीहरुको दावी छ । यद्दपी अन्तरिम आदेश जारी नभएपपछि अब उनीहरुले मुद्दा फैसलाको दिनलाई नै पर्खेर बस्नुपर्ने कानुन व्यवसायी बताउँछन् ।