मानसिक स्वास्थ्यको स्याहार गर्न भर्चुअल प्रणायाम र योग कार्यक्रम आयोजना

काठमाडौं । कोभिड–१९ महामारीको समयमा मानसिक, आध्यात्मिक र भावनात्मक पक्षलाई बलियो तुल्याउन भर्चुअल प्रणायाम र योग कार्यक्रम सम्पन्न भएको छ ।

लकडाउनका कारण मानिसहरुमा हुने तनाव र एन्जाइटीजस्ता मानसिक समस्यालाई योगको माध्यमबाट निराकरण गर्न इनरह्विल क्लब अफ नारायणीले यस्तो कार्यक्रम आयोजना गरेको हो ।

जेठ १८ देखि तीन दिनसम्म चलेको उक्त भर्चुअल योग कार्यक्रम क्लब अध्यक्ष प्रमिला रानाभाटको अध्यक्षमता सम्पन्न भएको थियो । आर्ट अफ लिभिङकी प्रशिक्षक अञ्जु शर्माले प्रशिक्षण दिएको कार्यक्रममा पवन नेपालले आध्यात्मिक प्रवचन दिएका थिए । सो अवसरमा नेपालले आध्यात्मक वाणीद्वारा सोच र व्यवहारमा परिवर्तन ल्याउन सकिने बताएका थिए ।

इनरविह्ल क्लब डिस्ट्रिक ३५० का अध्यक्ष सर्सिज पालिखेको प्रमुख आतिथ्यमा सम्पन्न कार्यक्रममा राष्ट्रिय प्रतिनिधि विजयलक्ष्मी श्रेष्ठ विशेष अतिथि थिइन् । उक्त भर्चुअल प्रशिक्षणमा २५० जनाले भाग लिएका थिए ।

स्वास्थ्य मन्त्रालयका अनुसार पछिल्लो समय महामारीको कारण मानसिक स्वास्थ्यको समस्या ब्यापकरुपमा बढिरहेको छ । मन्त्रालयले गतसाता महामारीको समस्यामा मानसिक स्वास्थ्यको ख्याल गर्न आग्रह गर्दै सूचना पनि जारी गरेको थियो ।