मनसुनमा आउने स्वास्थ्य समस्यासँग सामना गर्न स्वास्थ्य मन्त्रालय तयार : प्रवक्ता पौडेल

काठमाडौं । स्वास्थ्य मन्त्रालयले वर्षायामको बेलामा हुनसक्ने सम्भावित स्वास्थ्य समस्याहरुको सामना गर्न आफू तयारी अवस्थामा रहेको जनाएको छ ।

विपत्तिको बेलमा आइपर्ने विभिन्न स्वास्थ्य समस्याको सामना गर्न मन्त्रालय तयारी अवस्थामा रहेको स्वास्थ्य तथा जनसंख्या मन्त्रालयका प्रवक्ता कृष्णप्रसाद पौडेलले बताए ।

वर्षायाममा डेंगु, मलेरिया, झाडापखाला, ज्वरो लगायतको स्वास्थ्य समस्या आउने भन्दै उनले ती समस्या समाधानका निम्ति मन्त्रालय तयारी अवस्थामा रहेको जनाए । विपतबाट तुरुन्त उद्दार गर्नका लागि प्रत्येक स्थानीय तहमा र्‍यापिड रेन्स्पोन्स टीम गठन गर्नका लागि स्वास्थ्यकर्मीलाई तालिम दिएर राखिएको पनि उनले जनाए ।

उनले भने, ‘प्रत्येक स्थानिय तहमा र्‍यापिड रेन्सपोन्स टीम कसरी गठन गर्ने भनेर स्वास्थ्यकर्मी र स्वास्थ्य कार्यालयहरुलाई तालिम दिएर जनशक्ति तयारी अवस्थामा राखिएको छ । मनसुनसँगै झाडापखाला, ज्वरो, मलेरियाका बिरामी बढी देखिन्छन् । उपचारात्मक सेवा र प्रर्वद्धनात्मक सेवा सँगसँगै जानुपर्ने हुन्छ । स्थानीय तहमा रहेका द्रुत प्रतिकार्य समिति (र्‍यापिड रेन्पोन्स टीम)ले रेस्पोन्स गर्नुहुन्छ ।’

उनले भने, ‘डेंगु लगायतका विमारलाई चाहिने एन्टिजेन किट, परिक्षण सामग्री, मलेरियाको आरडिटी, डेंगुको किट, झाडापखालाको लागि जीवनजल लगायत औषधीको व्यवस्थापन केन्द्रीय स्टोर, प्रदेशस्थित मेडिकल स्टोर र जिल्लाहरुसँगको समन्वयमा त्यो व्यवस्थापनको काम हुन्छ । त्या नियमित काम भित्रै हुन्छ ।’

स्थानीय तह तथा प्रदेशले केन्द्र सरकारसँग माग गरेको खण्डमा केन्द्रमा पनि र्‍यापिड रेस्पोन्स टिम बनाइसकेको उनले जनाए ।