बेलहिया हुँदै नेपाल भित्रियो सेनाको कोभिड सामग्री

रुपन्देही । बेलहिया नाका हुँदै कोभिड सम्बन्धी विभिन्न औषधी र सामग्री बोकेका नेपाली सेनाका ट्रकहरु नेपाल भित्रिएका छन् ।

शुक्रबार ती सामग्री लिन भारत गएका नेपाली सेनाका २५ वटा ट्रक शनिबार बेलहिया नाका हुँदै नेपाल भित्रिएका हुन् । भारतबाट ती ट्रकहरुमा कोभिडसँग सम्बन्धित अपरेटिङ हेडलाइट, अटो रिफ्रेक्ट मिटर, बि–प्याड मेसिन, एबीजी मेशीन, ल्याब माइक्रोस्कोप, लाइट क्युरिङ कर्डलेस, आईसीयू भेन्टिलेटर, म्यानुअल स्प्रेयर, भाइरस ट्रान्सपोर्ट मिडिया विथ स्वाब, आरडीटी एन्टिजेन किट, एन ९५ मास्क, पीपीईलगायतका समान ल्याइएको नेपाली सेनाको भनाइ छ ।

यस्तै भारतले ६ वटा एम्बुलेन्स पनि प्रदान गरेको छ । तर यी सामग्री खरिद गरी आएको वा भारत सरकारले सहयोग प्रदान गरेको भन्ने केही खुलेको छैन ।

भारत सरकारले कोभिड रोग नियन्त्रणसँग सम्बन्धित २५ वटा ट्रक भारत गएर नेपाल फर्केको रुपन्देहीका प्रमुख जिल्ला अधिकारी अस्मान तामाङले जानकारी दिए ।