जोकोभिच र नाडाल फ्रेन्च ओपनको क्वाटरफाइनलमा

एजेन्सी । सुरुआती दुई सेट हारेर शानदार पुनरागमन गर्दै नोभाक जोकोभिचले वर्षको दोस्रो ग्राण्डस्लाम टेनिस फ्रेन्च ओपनको चौथो चरणबाटै अप्रत्यासित बाहिर्गमनको खतरा टारेका छन् ।

विश्व नम्बर एक सर्बियाली खेलाडीको प्रदर्शन सुरुआती दुई सेटमा कमजोर थियो । उनले दुवै सेट टाइब्रेकमा गुमाएका थिए ।

तर त्यसपछि १९ वर्षीय इटालियन किशोर खेलाडी लोरेन्जो मुसेट्टीले पूरा खेल खेल्न सकेनन् । तेस्रो र चौथो सेट क्रमसः ६–१ र ६–० जे जितेका जोकोभिचले पाँचौं सेटमा ४–० को अगता लिँदा मुसेटुटी चोटग्रस्त हुन पुगे ।

कोर्टबाट बाहिरिँदै गर्दा मुसेट्टीलाई उपस्थित सबै दर्शकले उभिएर सम्मान गरेका थिए ।

ग्राण्डस्लाम टेनिसमा जोकोभिचले दुई सेटमा हारेर पुनरागमन जित निकालेको यो पाँचौंपल्ट हो ।

रफायल नाडाल भने जान्निक सिन्नरलाई ७–५, ६–३ र ६–० को सेटमा सहजै पराजित गरी क्वाटरफाइनलमा पुगेका छन् ।

सुरुआती सेटमा दुईपल्ट सर्भ फल्ट गरे पनि नाडालले पुनरागमन गरी १८ औं वरियताका इटलीयन खेलाडीलाई पराजित गरेका हुन् ।