प्रतिपक्षीसँग कुरा नमिलेपछि प्रदेश २ सभाको बैठक स्थगित

जनकपुरधाम । स्थानीय तहको सशर्त अनुदानको विषयमा विपक्षी सांसदले विरोध जनाएपछि प्रदेश २ सभाको बैठक स्थगित भएको छ ।

सभामुख सरोज यादवले प्रदेशसभा बैठक सुरू गरेलगत्तै प्रमुख प्रतिपक्षी तीनै दलका सांसदहरू उठेर विरोध जनाएका थिए । आफूहरूको सिफारिसमा अनुदान पठाउने सहमतिविपरीत स्थानीय पालिकामा सशर्त अनुदान पठाइएको भन्दै विरोध गरेका थिए । सो विषयमा मुख्यमन्त्री लालबाबु राउतले जवाफ दिनुपर्ने अडान राखेपछि सभामुखले एक घण्टाका लागि प्रदेशसभा बैठक स्थगित गरेका थिए ।

त्यसपछि सरकार पक्षबाट आर्थिक मामिला तथा योजनामन्त्री विजय कुमार यादव र अन्य मन्त्रीहरूसहित प्रतिपक्षी तीनै पार्टीका संसदीय दलका नेतासँग छलफल निष्कर्षमा नपुगेको बताइएको छ ।

काँग्रेस संसदीय दलका नेता रामसरोज यादवले भने, ‘भोली विहान ११ बजे सबै पार्टीका संसदीय दलका नेता र सचेतक बसेर छलफल गर्ने कुरा भएछ । सहमती भयो भने मात्र भोलिको बैठक चल्न दिन्छौं ।’

प्रदेश सरकारका प्रवक्ता समेत रहेको आन्तरिक मामिला तथा कानून मन्त्री ज्ञानेन्द्र यादवले आजको छलफल सकारात्मक रहेको बताए ।