महाधिवेशनबारे निर्णय लिन देउवाले बोलाए बैठक

काठमाडौं । नेपाली कांग्रेसको १४ औं महाधिवेशनबारे निर्णय लिन सभापति शेरबहादुर देउवाले पदाधिकारी बैठक बोलाएका छन् ।

सभापति देउवाले शनिबार अपरान्ह २ बजे बूढानीलकण्ठमा बस्नेगरी पदाधिकारी र पूर्वपदाधिकारीको बैठक बोलाएका हुन् । कांग्रेसको महाधिवेशन भदौ ७ गतेदेखि १० गतेसम्मका लागि तोकिएको छ ।

कोरोना महामारीबाट उत्पन्न संकटका कारण महाधिवेशन अनिश्चित हुने सम्भावना बढेका बेला सभापति देउवाले बैठक बोलाएका हुन् । यसअघि देउवाले भदौमा महाधिवेशन गर्न आफू प्रतिवद्ध रहेको भन्दै विज्ञप्ति जारी गरेका थिए ।

त्यसअघि कांग्रेसका ७ जना युवा नेताले महाधिवेशन सम्पन्न गर्न वैकल्पिक उपाय खोज्नुपर्ने भन्दै सभापति देउवालाई भेटेका थिए । वरिष्ठ नेता रामचन्द्र पौडेल पक्षले पनि महाधिवेशन भदौमै सम्पन्न गर्न दबाब दिने निर्णय लिएको थियो । शनिबारको बैठकबाट महाधिवेशनबारे साझा धारणा बनाइने बताइएको छ ।

‘महाधिवेशन गर्नेमा कसैको विमति छैन । यद्यपि कोरोना संकटका बीच कसरी महाधिवेशन सम्पन्न गर्ने भन्ने विकल्पबारे छलफल गरेर साझा धारणा बनाउँछौं’, बैठकबारे एक कांग्रेस नेताले भने ।