अस्ट्रेलियाविरुद्ध नेपालले पहिलो हाफमा २ गोल खायो

काठमाडौं । विश्वकप तथा एसियन कपको छनोटअन्तर्गत कुवेतमा जारी अस्ट्रेलियाविरुद्धको खेलमा नेपालले पहिलो हाफमा २ गोल खाएको छ ।

कुवेतको जाबेर अल-अहमद रंगशालामा जारी खेलको छैठौं मिनेटमा नेपालले पहिलो गोल खाएको थियो । अस्ट्रेलियाका म्याथ्यु लेकीले गोल गर्दै नेपालविरुद्ध अग्रता दिलाएका थिए ।

पहिलो हाफको खेलसकिन ७ मिनेट बाँकी रहँदा फ्रान काराचिचले पुन: गोल गर्दै अस्ट्रेलियाको अग्रता दोब्बर पारे । विपक्षी खेलाडीलाई गोल गर्ने स्पष्ट मौकामा फाउल गरेसँगै अनुभवी डिफेन्डर रोहित चन्द पहिलो हाफको इन्जुरी समयमा रातो कार्डको सामना गर्दै मैदानबाट बाहिरिएका छन् ।

आफूभन्दा १३० स्थान माथि रहेको टोली अस्ट्रेलियाविरुद्ध नेपालले बाँकी ४५ मिनेट १० जनामा सीमित भएर खेल्नु पर्नेछ ।