निषेधाज्ञाले छायांकन स्थगित : आठवटा टिभी सिरियल बन्द, थप सिरियल बन्द हुने क्रममा

काठमाडौं । कोरोनाभाइरस संक्रमण रोकथामका लागि जारी गरिएको निषेधाज्ञाको मारमा टिभी सिरियल पनि परेका छन् । नियमितरुपमा प्रसारण हुँदै आएका सिरियल बन्द भएकाले यी लोकप्रिय श्रृंखलाको भविष्य कस्तो हुने भन्नेमा अन्यौल छ ।

सक्गिोनि नामक हाँस्य टेलिश्रृंखला बन्द भएको एक महिना पुगेको छ । निषेधाज्ञा लागु भएको केही सातासम्म पुरानै भागलाई प्रसारण गरिएपनि अब के गर्ने भन्ने अन्यौल छ ।

निर्देशक कुमार कट्टेल ‘जिग्री’ले निषेधाज्ञा खुला भएपछि पुनः छायांकन गरेर नयाँ एपिसोड ल्याउने तयारी भएको बताए ।

विष्णु सापकोटाले निर्देशन तथा अभिनय गर्दै आएको टेलिश्रृंखला हर्के हल्दार पनि अहिले बन्द छ । नयाँ एपिसोड खिच्न नमिल्ने भएपछि बन्द गरिएको सापकोटाले जनाए ।

सिरियल बन्द गरेर सापकोटा अहिले हेटौंडास्थित घरमा पुगेका छन् । निषेधाज्ञा खुलेपछि छायांकन सुरु गरिने उनले जनाए ।

निषेधाज्ञाको मारमा भद्रगोल, गोलमाल, अति भो, अड्डा, हाम्री झ्याउँकिरी, कुलबहादुर काका पनि स्थगित भएका छन् । अहिले नियमित प्रसारण भैरहेकोमा मेरी बास्सै, हल्का रमाइलो र जुठे छन् । जुठको पनि स्टक सकिएकाले अब के गर्ने भन्ने पिरलो छ ।