कर्णाली प्रदेश : वीरेन्द्रनगरमा ५ सय शय्या र प्रत्येक जिल्लामा एक सरुवा रोग अस्पताल

सुर्खेत । कर्णालीका नौ जिल्लामा एक-एक वटा सरुवा रोग अस्पताल निर्माण गरिने भएको छ । त्यस्तै, वीरेन्द्रनगरमा पाँच सय शय्याको सरुवा रोग अस्पताल स्थापना गरिने भएको छ ।

आगामी आर्थिक वर्षको नीति तथा कार्यक्रम प्रस्तुत गर्दै प्रदेश प्रमुख गोविन्दप्रसाद कलौनीले सरुवा रोगका कारण समस्यामा पर्ने कर्णालीका नागरिकलाई सास्ती हुनबाट जोगाउन सरकारले यी अस्पतालहरू स्थापना गर्न लागिएको बताएका छन् ।

कर्णालीका सबै जिल्ला अस्पतालमा आईसीयू र भेन्टिलेटर सुविधा थप्ने, प्रदेश अस्पताल कालागाउँलाई शिक्षण अस्पतालको रूपमा विकास गर्ने, कोरोना महामारी आवश्यक पर्ने औषधी तथा अन्य उपकरणहरू खरिद गरिने सरकारको योजना छ । हरेक जिल्लामा अक्सिजन प्लान्ट स्थापना गरिने पनि सरकारको नीति तथा कार्यक्रममा उल्लेख छ ।

प्रमुख कलौनीले एक स्थानीय तह एक भकारी कार्यक्रम लागू गरिने सार्वजनिक गरे । यस्तै कर्णालीमा पेट्रोलियम पदार्थ भण्डारणका लागि सम्भाव्यता अध्ययन गर्न जग्गा प्राप्तीको काम पनि अघि बढाइने भएको छ ।