पाटन उच्च अदालतले भन्यो : फिल्म समीक्षाले कसैको मानमर्दन गर्दैन

काठमाडौं । फिल्म ‘वीरविक्रम २’ लाई लिएर गरिएको समीक्षा विवादमा अदालतले अन्तिम फैसला सुनाएको छ । पाटन उच्च अदालतले फिल्म समीक्षाले कसैको चरित्र हत्या नहुने आदेश सुनाएको छ ।

दुई वर्षअघि मिम नेपाल युट्युव च्यानलमा कमेडियन प्रनेश गौतमले फिल्म वीरविक्रम २ लाई व्यंग्यात्मक शैलीमा समीक्षा गरेका थिए । उक्त समीक्षा शैलीप्रति आपत्ति जनाउँदै निर्देशक एवं निर्माता मिलन चाम्सले प्रहरी र अदालतमा उजुरी दिएका थिए ।

चाम्सकै उजुरीका आधारमा गौतमविरुद्ध विद्युतीय कारोवार ऐनअन्तर्गत मुद्दा चलेको थियो र उनलाई आठदिन सम्म प्रहरी हिरासतमा समेत राखिएको थियो । अदालतले यसअघि साधारण तारखेमा रिहा गर्न आदेश दिएपनि अन्तिम फैसला आउन बाँकी थियो ।

काठमाडौं जिल्ला अदालतले ०७६ साउन ९ गते नै प्रनेशको पक्षमा फैसला गरेको थियो । यसमा चित्त नबुझेको भन्दै सरकारले फैसलाविरुद्ध पुनरावेदन गरेको थियो । यसमाथि पाटन उच्च अदालतले पनि समीक्षाले कसैको मानमर्दन नहुने भन्दै जिल्ला अदालतकै फैसलालाई सदर गरेको छ ।