गण्डकीः सरकार बनेको चार दिनमै बजेट भाषण, मुख्यमन्त्रीले नै वाचन गर्ने

काठमाडौं । ७ वटै प्रदेश सरकारले भोलि नयाँ बजेट ल्याउँदै छन् ।

सोही क्रममा गण्डकी प्रदेशको बजेट मुख्यमन्त्री कृष्णचन्द्र नेपाली पोखरेलले प्रस्तुत गर्ने भएका छन् । पृथ्वीसुब्बा गुरुङले विश्वासको मत प्राप्त गर्न नसकेपछि बहुमत सदस्यको समर्थनमा गण्डकीमा नयाँ सरकार बनेको ४ दिनमात्र भएको छ ।

आन्तरिक मामिला तथा कानून मन्त्रालयको जिम्मेवारीसमेत आफैंले लिएका कारण मुख्यमन्त्रीले नै बजेट वाचन गर्ने भएका हुन् ।

संविधानत: प्रदेश सरकारले असार १ मै बजेट ल्याइसक्नुपर्ने दबाबका कारण सरकार गठन भएको छोटो समयावधि बीचमै नयाँ बजेट ल्याउनुपर्ने गण्डकी सरकारलाई चटारो परेको छ ।

गण्डकी प्रदेश सरकारका प्रवक्ता कुमार खड्काले मुख्यमन्त्री पोखरेले नै प्रस्तुत गर्ने बताए । उनले भने, ‘आन्तरिक मामिला तथा कानून मन्त्रालय पनि मुख्यमन्त्रीसँग नै भएकोले उहाँले नै नयाँ बजेट प्रस्तुत गर्ने छन् ।’

खड्काका अनुसार नयाँ बजेटमा कोरोना महामारी नियन्त्रण र विकास निर्माणले प्राथमिकता पाउँनेछ ।