पोल्यान्डका क्रिचोवाइकलाई युरो २०२० को पहिलो रातो कार्ड

काठमाडौं । पोल्यान्डका ग्रिजगोर्ज क्रिचोवाइकले युरो २०२० को पहिलो रातो कार्ड पाएका छन् । सोमबार भएको समूह ‘ई’ अन्तर्गतको खेलमा विपक्षी खेलाडीमाथि खराब फाउल गरेका क्रिचोवाइकले ६२औं मिनेटमा दोहोरो पहेँलो कार्डको सामना गर्दै मैदान छाड्नु परेको थियो ।

उनले रातो कार्डको सामना गरेर मैदान छाड्नु पर्दा १-१ गोलको बराबरीमा रहेको खेलमा स्लोभाकियाले ६९औं मिनेटमा अर्को गोल थप्दै खेल आफ्नो पक्षमा पारेको थियो ।

यसअघि युरो २०१२ मा पोल्यान्डका गोलकिपर वेइचेक सेचेन्स्नीले उद्घाटन खेलमै रातो कार्डको सामना गर्दै दोस्रो खेल गुमाएका थिए । क्रिचोवाइकले पनि एक खेल गुमाउने छन् ।