कर्णालीमा एमाले संसदीय दल बैठक बस्दै, पुनर्वहाली भएका ४ सांसदलाई पत्र

सुर्खेत । एमालेको कर्णाली संसदीय दल वैठक अहिले बिहान ८ बजे बस्दैछ । नीति तथा कार्यक्रम प्रदेशसभामा निर्णयार्थ पेश हुनुअघि बैठक बस्न लागेको हो ।

हिजो पुनर्वहाली भएका चार संसदलाई पनि संसदीय दलको वैठकमा सहभागी हुन एमालेले आमन्त्रण गरेको छ । ३९ सदस्यीय प्रदेश सभामा एमाले एक्लैको २० सिट पुगेपछि सरकार अल्पमतमा परिसकेको अवस्थामा आपसी सल्लाह गर्न वैठक बोलाइएको प्रमुख सचेतक गुलावजंग शाहले बताए । यसका लागि चारैजना माननीयलाई पत्र पठाइसकेको उनले जानकारी दिए ।

शाहले नेपाल प्रेससँग भने, ‘प्रदेश सभाभित्र दलको संख्या हेर्दा हाम्रो बीस पुगेको छ । विपक्षमा २० पुग्दा सत्तारुढ दलको संख्या १८ मात्रै छ । त्यस मानेमा आज बस्ने दलको हाम्रो वैठकले कसरी अघि बढने भन्ने बारेमा आवश्यक सल्लाह गर्नेछ ।’

बदलिएको परिस्थितिमा पार्टीभित्र सल्लाह गर्नकै लागि प्रदेशसभा वैठक आज १ बजे बस्नेगरी प्रदेशसभा स्थगित भएको उनको भनाइ छ ।
एमालेमा पुनर्वहाली भएका चार जना सांसदलाई निम्तो गरिएको भन्दै उनले उनीहरु सबै सहभागी हुने आशा गरे ।

वैठकमा आइसकेपछि हामी कसरी अघि बढने भनेर सल्लाह गर्नेछौं । संसदमा हाम्रो दलका नेताले स्पष्ट बोल्नु भएको छ,’ उनले भने ।

उनले थपे, ‘एमालेमै गएर बस भन्ने आदेशलाई उहाँहरु आफैंले आएर स्वीकार गर्नुपर्ने हो । हामीले चिठी पठाएका छौं, निमन्त्रणा गरेका छौं । मलाई विवश्वास छ, अहिले बस्ने वैठकमा उहाँहरु आउनुहुनेछ । विगतमा जे जस्तो भए पनि अब नयाँ शिराबाट जाऔं । उहाँहरुप्रति कुनै पनि आग्रह-पूर्वाग्रह राखिने छैन । तपाईहरु निशंकोच आउनुस्, मज्जाले छलफल गरेर अघि बढौं ।’