कर्णाली प्रदेश : नीति तथा कार्यक्रमको विपक्षमा मतदान गर्न एमालेको ह्वीप

सुर्खेत । कर्णाली प्रदेश सरकारले आर्थिक वर्ष २०७८/७९ का लागि पेस गरेको वार्षिक नीति तथा कार्यक्रमका विपक्षमा मतदान गर्न नेकपा एमालेले ह्वीप जारी गरेको छ ।

फ्लोर क्रस गरेको आरोपमा पार्टीको कारवाहीपछि पदमुक्त भई सर्वोच्चको आदेशबाट पुनर्वहाली भएका एमालेका चार सांसदले के गर्छन् भन्नेबारे चासो छ ।

प्रदेशसभामा सभामुखसहित एमालेका २०, कांग्रेस र माओवादीका १८ र राप्रपाका एक सांसद छन् ।

‘सरकारले ल्याएको नीति तथा कार्यक्रममाथि नेकपा एमालेका सबै माननीयले अनिवार्य रूपमा विपक्षमा मतदान गर्ने निर्णय भएको छ ’, एमाले प्रमुख सचेतक गुलाबजङ्ग शाहले भने, ‘सबैजना पुनर्वहाली भइसकेका छन् । सबै एमाले हुनुहुन्छ ।’

उनले सबै एमाले भइसकेको र संसदीय दलमा कुनैपनि विवाद नरहेको बताएका छन् ।

एमाले संसदीय दलको बैठक सकिएलगत्तै कर्णाली प्रदेशसभाको बैठक शुरू भएको छ । अहिले मुख्यमन्त्री महेन्द्रबहादुर शाहीले नीति तथा कार्यक्रममाथि उठेका सवालको जवाफ दिने कार्यसूची छ ।

मुख्यमन्त्रीले जवाफ दिइसकेपछि मत विभाजनका आधारमा नीति तथा कार्यक्रमलाई निर्णयार्थ सभामुख राजबहादुर शाहीले सदनमा पेस गर्नेछन् । बजेट प्रसतुत गर्ने कार्य भने चार बजे बस्ने अर्को वैठकमा गरिने सचिवालयले जनाएको छ ।