स्वीटजरल्यान्डविरुद्ध उत्कृष्ट सुरुआतलाई निरन्तरता दिने इटालीको लक्ष्य

काठमाडौं । युरो २०२० को समूह ‘ए’ अन्तर्गत बुधबार राति हुने खेलमा इटालीले स्वीटजरल्यान्डको सामना गर्दैछ । प्रतियोगिताको उद्घाटन खेलमा टर्कीलाई ३-० गोलको नतिजाले पराजित गरेको इटाली उत्कृष्ट सुरुआतलाई निरन्तरता दिन चाहन्छ ।

पहिलो खेलमा सर्वाधिक तीन अंक बटुल्न असफल रहेको स्वीटजरल्यान्ड वेल्ससँग १-१ गोलको बराबरीमा रोकिएको थियो । वेल्सविरुद्ध १-० को अग्रता बनाए पनि किफर मुरीको गोलसँगै स्वीटजरल्यान्ड अंक बाँड्न बाध्य बनेको थियो ।

इटालीको रोमस्थित स्टाडियो ओलिम्पिकोमा यो खेल नेपाली समयअनुसार राति १२:४५ बजे सुरु हुनेछ ।

आजको खेलमा जित हासिल गरे इटाली एक खेल अगावै अन्तिम १६ मा पुग्ने निश्चित हुन्छ भने स्वीटरल्यान्डको पनि तीन अंक हासिल गर्न सके सम्भावना बलियो बन्ने छ ।

यद्यपि, इटालीलाई उसकै मैदानमा पराजित गर्नु स्वीटजरल्यान्डका लागि सहज पक्कै हुने छैन ।