चिनियाँ यान पहिलोपटक आफ्नै अन्तरिक्ष केन्द्रमा पुग्यो, अर्को यानसँग अन्तरिक्षमा डक-प्रक्रिया सम्पन्न

बेइजिङ । आफूले निर्माण गरेको पहिलो अन्तरिक्ष केन्द्रमा चीनले विहिबार तीनजना यात्री पठाएको छ । सेन्जु-१२ नामक उक्त अन्तरिक्ष यान विहिबार अपरान्ह नेपाली समयानुसार २ बजे स्पेस स्टेसनमा पुगेको छ ।

केन्द्रमा रहेको तियान नामक अर्को यानसँग पृथ्वीबाट पठाइएको यान डक्ड (जडान हुने प्रक्रिया) पुरा भएको चीनले जनाएको छ । उक्त यानमा चिनियाँ अन्तरिक्ष यात्रीहरु नेइ हेइसङ, लिउ बोमिङ र ताङ होङ्बो छन् ।

यो मिसन चीनको अहिलेसम्मकै लामो अन्तरिक्ष मिसन रहेको जनाइएको छ । यो यान पृथ्वीबाट ३८० किलोमिटर टाढाको केन्द्रमा ३ महिना रहनेछ । विहिबार २–एफ रकेटमार्फत यान प्रक्षेपण गरिएको थियो ।

आफ्नै अन्तरिक्ष केन्द्र बनाउने र त्यसतर्फ मान्छे पठाउने कार्यलाई चीनको अन्तरिक्ष महाशक्ति बन्ने तर्फको यात्राको अर्को कदम मानिएको छ । ६ महिनाअघि चीनले चन्द्रमामार्फत पृथ्वीमा त्यहाँको चट्टान ल्याएर अनुसन्धान गरिरहेको छ ।

मानवसहितको यान पठाउनुमा चिनियाँ उद्देश्य केन्द्रमा रहेको २२.५ टन तौलको तियान मोड्युललाई संचालनमा ल्याउनु हो ।