आम्दा अस्पताल स्तरोन्नतिका लागि बुटवल उपमहानगरको ५० लाख सहयोग

रुपन्देही । बुटवलको आम्दा अस्पताललाई बुटवल उपमहानगरपालिकाले ५० लाख बराबरको सहयोग गरेको छ । महिला तथा बालबालबालिकाको उपचार हुने यो अस्पतालमा कोभिड संक्रमितको पनि उपचार हुन थालेको छ ।

स्वास्थ्य विज्ञहरुले महामारीका नयाँ-नयाँ भेरिएन्ट आउनसक्ने र त्यसले जनस्वास्थ्यमा गम्भीर असर पुर्‍याउने बताइरहेका बेलामा बुटवलले महामारीको पूर्वतयारीलाई प्राथमिकता दिएको जनाएको छ ।

कोभिड-१९ को महामारीका नयाँ र खतरनाक लहरलाई लक्षित गर्दै जनस्वास्थ्यका क्षेत्रमा प्रभावकारी पूर्वतयारी थाल्न बुटवल उपमहानगरले पहल थालेको छ ।

महामारीमा बालबालिका र सुत्केरीका लागि लक्षित गरेर उपचारका सबै प्रबन्ध मिलाउन तथा पूर्वतयारीलाई प्रभावकारी बनाउन सबै पक्षसँग समन्वय एवम् सहकार्य भइरहेको उपमहानगरका प्रमुख शिवराज सुवेदीले जानकारी दिए ।

बुटवल उपमहानगरपालिका मातहत रहेको सिद्धार्थ बाल तथा महिला अस्पताललाई बाल तथा प्रसूती अस्पतालमा रुपान्तरण गर्ने गरी पहल भइरहेको र तत्कालका लागि कोभिड विशेष सेवा थप गर्न लागिएको प्रमुख सुवेदीको भनाइ छ ।

सेवालाई विस्तार गर्दै कोभिड प्रभावित बालबालिका र सुत्केरीलाई लक्षित आधुनिक उपकरण जडित सुविधासम्पन्न उपचार केन्द्र बनाउन लागिएको अस्पतालका मेसु डा।राजेन्द्रप्रसाद बस्यालले बताए । अहिले भइरहेको सेवालाई जनशक्ति र आवश्यक उपकरणसहित थप विस्तार र व्यवस्थित बनाउन सुरु गरिएको बताए ।

उनले उपमहानगरबाट ५० लाख बारबरको स्रोत सुनिश्चित गर्ने गरी ३० लाख प्राप्त भइसकेको र अस्पालमा निर्माणका काम पनि अगाडि बढिरहेको जानकारी दिए । अस्तालमा विशेष कक्ष निर्माण गरेर आवश्यक बेड र उपकरण थप गर्न लागिएको छ ।