डेनमार्कलाई हराउँदै बेल्जियम युरो २०२० को अन्तिम १६ मा

काठमाडौं । समूह चरणको दोस्रो खेलमा डेनमार्कविरुद्ध १-२ को पुनरागमन जित निकाल्दै बेल्जियम युरो २०२० को अन्तिम-१६ मा पुगेको छ ।

बिहीबार राति भएको खेलको दोस्रो मिनेटमै १-० ले पछि परेको बेल्जियमले दोस्रो हाफमा दुई गोल फर्काउँदै लगातार दोस्रो जित सुनिश्चित गर्‍यो ।

पहिलो खेलमा रुसमाथि ३-० को जित निकालेको बेल्जियमलाई जित दिलाउन थ्रोगन हाजार्ड र केभिन डी ब्रयुनाले १-१ गोल गरे । खेलको दोस्रो मिनेटमै होइबर्गको पासमा युसुफ पौल्सेनले गोल गर्दै डेनमार्कलाई अग्रता दिलाएका थिए ।

सुरुआतमा भ्रमणकारी बेल्जियममाथि निरन्तर आक्रमण गरेको डेनमार्कले अन्तिमसम्म प्रतिस्पर्धात्मक प्रदर्शन गरेको थियो । यद्यपि, वैकल्पिक खेलाडीको रूपमा मैदानमा प्रवेश गरेका कप्तान इडेन हाजार्ड र डी ब्रुयनाको उत्कृष्ट प्रदर्शनमा बेल्जियमले जित हासिल गर्‍यो ।

हाजार्डले ५५ औं मिनेटमा गरेको गोलसँगै बराबरी गरेको बेल्जियमका लागि ७१औं मिनेटमा डी ब्रयुनाले विजयी गोल गरे ।

जितसँगै बेल्जियम प्रि-क्वार्टरफाइनलमा पुगेको छ । इटालीपछि बेल्जियम अन्तिम १६ मा पुग्ने दोस्रो देश बनेको छ ।