स्कटल्यान्डसँग बराबरीमा रोकियो इङ्ल्यान्ड

काठमाडौं । स्कटल्यान्डसँग गोलरहित बराबरीमा रोकिएसँगै इङ्ल्यान्ड एक खेल अगावै युरो २०२० को नकआउटमा स्थान सुरक्षित गर्नबाट चुकेको छ ।

शुक्रबार राति लन्डनस्थित वेम्ब्ली स्टेडियममा भएको समूह ‘डी’ अन्तर्गत आफ्नो दोस्रो खेलमा इङ्ल्यान्ड पुरानो प्रतिद्वन्दी स्कटल्यान्डलाई पराजित गर्न असफल रह्यो ।

खेलको सुरुआतदेखि नै बल पोसेसनमा प्रभुत्व जमाएको इङ्ल्यान्डले गोलका लागि अवसरको सिर्जना गरे पनि प्रभावकारी फिनिसिङ नहुँदा बराबरीमा चित्त बुझाउनु पर्‍यो । पहिलो खेलमा चेक गणतन्त्रसँग २-० ले पराजित भएको स्कटल्यान्डको बराबरीसँगै समूह चरण पार गर्ने सम्भावना बढेको छ ।

यस्तै पहिलो खेलमा क्रोएसियालाई १-० ले पराजित गरेको इङ्ल्यान्डको पनि नक आउट प्रवेश सम्भावना प्रवल छ ।