थुनिएको रोङ्सीबाट पानी बग्न थालेपछि तामाकोशीको तटीय क्षेत्रमा जोखिमको खतरा टर्दै

काठमाडौं । तामाकोशी नदीको तल्लो तटीय क्षेत्रमा तत्काललै ठूलो जोखिम नरहेको जिल्ला प्रशासन कार्यालय दोलखाले जनाएको छ । तामाकोशीको शाखा नदी रोङसी पहिरोले थुनिएपछि खतराको सूचना दिइएको थियो ।

शनिवार दिनभर लगाएर चीनियाँ पक्षले रोङ्सीको वहावलाई केही खोल्न सफल भएको जिल्ला प्रहरी प्रमुख भेषराज रिजालले जानकारी दिए । विस्तारै पानी बग्न थालेपछि एकैपटक नदी फुट्ने खतरा टरेको छ ।

यद्यपी नदी तटीय क्षेत्रका बासिन्दालाई सतर्कता अपनाउन रामेछाप जिल्ला प्रशासन कार्यालयले आग्रह गरेको छ । चीनको तिङ्ग्री काउन्टीतर्फबाट आउने रोङ्सीलाई पहिरोले थुनेपछि तामाकोशी क्षेत्रमा जोखिम बढेको थियो ।

माथिल्लो तामाकोशी जलविद्युत आयोजनाको जलाशयका चारवटा ढोका भने खोलिएको छ । अहिले तामाकोशीमा लेदोसहितको बाढी आएको छ ।