दीपकराज गिरीको विश्लेषण : युरो २०२० जर्मनी र कोपा ब्राजिलले जित्न सक्छन्

काठमाडौं । यतिबेला फुटबलको समेत मौसम छ । युरोपियन च्याम्पियनसिप र कोपा अमेरिकाजस्ता विश्व चर्चित फुटबल प्रतियोगिता आयोजना भैरहेको छन् । सर्वसाधारणदेखि सेलेव्रिटीसम्ममा फुटबलको क्रेज छ ।

अभिनेता एवं फिल्म निर्माता दीपकराज गिरी फुटबल क्रेजी सेलेव्रिटी हुन् । विश्वकपमा अर्जेन्टिना र युरो २०२० मा इटाली उनका मनपर्ने टीम हुन् । अहिलेका दुबै प्रतियोगिता नछुटाइ उनी हेरिरहेका छन् ।

समय मिलेसम्म दीपकले सबै गेमहरु हेरिरहेका छन् । फुटबललाई विश्लेषण गर्न सक्ने थोरै सेलेव्रिटीमध्ये उनी पर्छन् । उनको विचारमा यसपटक युरो २०२० निकै प्रतिस्पर्धात्मक बनिरहेको छ ।

‘निकै कम्पिटिसन छ युरोमा यसपटक । एकसे एक टीमहरु छन् । कसले जित्छ भनेर यसै भन्न मुस्किल छ’ दीपक भन्छन्, ‘मनदेखि इटालीले जित्नुपर्छ जस्तो लाग्छ । तर, अस्तिमको गेम हेर्दा जर्मनीले जित्ला जस्तो लाग्छ ।’

दक्षिण अमेरिकामा चलिरहेको कोपा अमेरिकामा समेत प्रतिस्पर्धा भैरहेको उनको भनाई छ । मनदेखि अर्जेन्टिनाले कोपा जितोस् भन्ने चाहने दीपक ब्राजिलले उपाधि जित्न सक्ने बताउँछन् । ‘यसपटक कोपामा ब्राजिल बलियो देखिएको छ’ उनी भन्छन् ।

निषेधाज्ञाको फुर्सदमा रहेका दीपक फिल्मको स्क्रिप्ट लेखनमा व्यस्त छन् । केही स्क्रिप्ट लेखन सकिए अर्को वर्ष फिल्म छायांकनमा जान सकिने उनको बुझाइ छ । दीपक यो वर्ष दहचोकमा आफ्नै लगानीमा फिल्म स्टुडियो निर्माणमा सक्रिय हुनेछन् ।