समूह विजेता बन्दै स्वीडेन अन्तम १६ मा, पोल्यान्ड बाहिरियो

काठमाडौं । समूह चरणको अन्तिम खेलमा पोल्यान्डमाथि ३-२ को जित निकालेको स्वीडेन समूह ईको विजेता बन्दै युरो २०२० को अन्तिम १६ मा पुगेको छ ।

बुधबार सेन्ट-पिटर्सबर्गमा भएको खेलको दोस्रो मिनेटमा एमिल फोर्सबर्गले गोल गर्दै स्वीडेनलाई अग्रता दिलाएका थिए । पहिलो हाफमा १-० को अग्रता लिएको स्वीडेनका लागि फोर्सबर्गले पुन: ५९औं मिनेटमा गोल गर्दै अग्रता दोब्बर पारेका थिए ।

दुई गोलले पछिपरेको पोल्यान्ड स्टार कप्तान रोबर्ट लेवान्डोस्कीले गरेको दुई गोल मद्दतमा बराबरीमा पुगेको थियो । लेवान्डोस्कीले ६१ र ८४औं मिनेटमा गोल गरेका थिए ।

तर, इन्जुरी समयमा भिक्टोर क्लाइस्सनले गोल गर्दै स्वीडेनको जित सुनिश्चित गरे । स्वीडेनले ए,बी,सी,डीमध्ये एक समूहबाट उत्कृष्ट नतिजासहित तेस्रो हुने टोलीसँग अन्तिम १६ मा खेल्नेछ । समूह ईबाट स्पेन समूह उपविजेता बन्दै प्रि-क्वार्टरफाइनलमा पुगिसकेको छ ।