पोखरा महानगरले ल्यायो ६ अर्ब २७ करोड रुपैयाँको बजेट

काठमाडौं । असार १० गतेसम्ममा स्थानीय तहहरुले बजेट प्रस्तुत गर्नुपर्ने संवैधानिक व्यवस्थानुसार पोखरा महानगरपालिकाले आर्थिक वर्ष २०७८/८९ को बजेट प्रस्तुत गरेको छ।

पोखरा महानगरपालिका मेयर मानबहादुर जीसीले बुधवार नीति तथा कार्यक्रम प्रस्तुत गरेका थिए । आज उक्त महानगरपालिकाकी उपमेयर मञ्जुदेवी गुरुङले आगामी आर्थिक वर्षको बजेट प्रस्तुत गरेकी छिन् । महानगरपालिकाले कुल ६ अर्ब २७ करोड ७५ लाख रुपैयाँको बजेट प्रस्तुत गरेको छ ।

जसमध्ये संघीय सरकार प्राप्त हुने वित्तीय हस्तान्तरणवाट २ अर्ब ५६ करोड १६ लाख अर्थात ४१ प्रतिशत , प्रदेश सरकारको वित्तीय हस्तान्तरणबाट ९ करोड २८ लाख अर्थात १.५ प्रतिशत, संघीय सरकारको राजस्व बाँडफाँडवाट ३१ करोड २१ लाख ९४ हजार ५ , प्रदेश सरकार राजस्व बाडँफाडँवाट ६ करोड १८ लाख अर्थात १ प्रतिशत, आन्तरिक आयबाट २ अर्ब २२ करोड अर्थात ३५ प्रतिशत संकलन हुने र अपुग हुने १ अर्ब ३ करोड ७५ लाख रुपैयाँ रकम गत आ.व को सञ्चित बचत र चालू आर्थिक वर्षको बचत हुने रकमबाट स्रोत व्यवस्थापन गर्ने महानगरपालिकाले जनाएको छ ।

कुल विनियोजित बजेट मध्ये २ अर्ब ९४ करोड ९० लाख रुपैयाँ अर्थात ४६।४ प्रतिशत , पुँजीगत तर्फ ३ अर्व ३६ करोड ८० लाख अर्थात ५३।६ प्रतिशत रकम विनियोजन गरेको छ ।

त्यस्तै कुल खर्च मध्ये महानगरपालिको कार्यालय तर्फ २८ करोड ८६ लाख अर्थात १४ प्रतिशत,सामाजिक विकासतर्फ १२ करोड ७९ लाख अर्थात २ प्रतिशत , शिक्षातर्फ १ अर्ब ४२ करोड ८७ लाख अर्थात २२।७५ प्रतिशत, कृषि तर्फ १४ करोड ४९ लाख अर्थात २.३ प्रतिशत , स्वास्थ्यतर्फ ४० करोड २२ लाख अर्थात ६.४ प्रतिशत, वडा कार्यालय तर्फ ४१ करोड ६० लाख अर्थात ६.६ प्रतिशत, पुर्वाधार तर्फ २ अर्ब ८६ करोड ९० लाख अर्थात ४५.७ प्रतिशत बजेट विनियोजन गरिएको छ ।

महानगरपालिकाको तिव्ररुपमा सहरीकरण भइरहेको क्षेत्रमा उपभोक्ता समूहहरुबाट १० करोड सहयोगको प्रतिवद्धता र ‘हाम्री बनाउछौं हाम्रो महानगरपालिका’ अन्तर्गत १० करोड रुपैयाँ गरी कुल २० करोड विनियोजन गरिएको छ । त्यस्तै वडा भवन , विद्यालय,स्वास्थ्य चौकी जस्ता भवन निर्माण र मर्मत संभारका लागि महागरपालिकाले ३० करोड रुपैयाँ विनियोजन गरेको छ ।

‘हाम्रो पोखरा उज्यालो पोखरा’ अभियान अन्तर्गत सडक वत्तीका लागि विद्युत प्राधिकरणले १३ करोड र यसको कुल लागतमा महानगरपालिकाले ५० प्रतिशत बजेट दिने प्रतिवद्धता जनाएको छ ।

त्यस्तै सडक सफा गर्ने १ थान ब्रुमर खरिदका लागि २ करोड ५० लाख विनियोजन गरेको छ । त्यस्तै महानगरपालिकाले पुर्वाधार प्रयोग परिक्षण प्रयोगशाला निर्माणका, एम्वुलेन्स तथा दमकल खरिद, सरसफाइका लागि ल्याण्डफिल्ड साइड निर्माण, खानेपनीको पाइपलाइन विस्तार जस्ता कार्यक्रमहरुमा महागरपालिकाले बजेटको प्रवन्ध गरेको छ ।

‘आहा रारा गोल्ड कप’लाई महानगरपालिकाको चिनारीको रुपमा विकास गर्ने महानगरपालिकाले प्रतिवद्धता जनाएको छ भने विभिन्न विद्यालयस्तरीय खेलकुदलाई आवश्यक बजेट विनियोजन गरिएको छ ।

शिक्षातर्फ महानगरपालिका १ अर्ब ४९ करोड रुपैयाँ विनियोजन गरेको छ । महागनगरपालिकाले वडा कार्यालयहरुले खर्च गर्न सक्ने गरी ३९ करोड ६० लाख रुपैयाँ वजेट विनियोजन गरेको छ ।

डिजिटल कर प्रणालीका लागि महानगरपालिकाले ६४ लाख रुपैयाँ विनियोजन गरेको छ । पोखरा महानगरापालिकालाई डिजिटल पोखरा निर्माणका लागि १ करोड ५० लाख रुपैयाँ विनियोजन गरिएको छ । यसैगरी कृषि तथा सिचाईका लागि १० करोड, जेष्ठ नागरिकको भत्ताका लागि ६ करोड बजेट विनियोजन गरेको छ ।