साना तथा मझौला र ठुला कम्पनीको छुट्टाछुटै प्लाटफर्म मार्फत कारोबार गराउने बोर्डको तयारी

काठमाडौं । नेपालको धितोपत्र बजारमा साना तथा ठूला पूँजीकरण भएका कम्पनीहरुले एकै किसिमको व्यवस्था अन्तर्गत पूँजीको संकलन तथा परिचालन गर्ने गरिरहेका छन् ।

सो व्यवस्थाका कारण साना तथा ठूला कम्पनीको आवश्यकता अनुरुप वित्तीय औजार विकासमा कठिनाइ भएको धितोपत्र बोर्डकाे निष्कर्ष रहेको छ । साना ठुला कम्पनीको पूँजी बजार मार्फत् प्राथमिकता प्राप्त क्षेत्रमा पूँजी परिचालन कार्यक्रम निर्धारण तथा कार्यान्वयन गर्न समस्या देखिएको धितोपत्र बोर्डको बुझाइ छ ।

बजारलाई व्यवस्थित गर्न ‍ बोर्डले आवश्यक एकै प्लेटफर्ममा सूचीकरण भई कारोबार गर्दा एकै प्रकारको धितोपत्र सूचकांकले बजारको यथार्थ चित्रण हुन नसक्ने बोर्डले जनाएको छ ।

यसका लागि बोर्डको आर्थिक वर्ष २०७७/७८ को धितोपत्र तथा वस्तु विनिमय बजार सम्बन्धी नीति तथा कार्यक्रमको बुँदा नं। १३ मा साना तथा मझौला कम्पनीको लागि छुट्टै कारोबार हुने गरी एसएमई प्लाटफर्म तथा अन्य कम्पनीको कारोबारका लागि मेन बोर्डको व्यवस्था गर्नको लागि नेपाल स्टक एक्सचेञ्ज (नेप्से) लाई सहजीकरण गर्ने कार्यक्रम समावेश गरिएको छ ।

उक्त कार्यक्रम कार्यान्वयन गर्न नेप्सेमा सूचीकरण भएका तथा आगामी दिनमा सूचीकरण हुने साना तथा मझौला आकारका कम्पनीहरुको लागि उक्त कम्पनीको चुक्ता पूँजी र बजार पूँजीकरणको आधारमा नेप्सेको छुट्टै कक्षमा सूचीकरण तथा कारोबार हुने व्यवस्था मिलाउने निर्णय बोर्डले गरेको छ ।

यसका लागि आवश्यक पूर्वाधार र कानूनी व्यवस्थाका लागि अन्तर्राष्ट्रिय अभ्यासलाई समेत अवलम्बन गरिएका नेपालको साना तथा मझौला उद्योग व्यवसायलाई दोस्रो बजारमा कारोबारका सम्वन्धमा अध्ययन प्रतिवेदन तयार गरिएको थियो ।

उक्त अध्ययन प्रतिवेदन आधारमा एसएमई सम्वन्धी नेप्सेबाट गर्नुपर्ने तयारी , पूर्वाधारका सम्बन्धमा नेप्सेसँग राय सुझाव माग गरिएको बोर्डले जनाएको छ । नेप्सेले पनि अगाडि बढ्न उपयुक्त हुने वताएकाले सोही बमोजिम नेप्सेसँग बोर्डले राय सुझाव माग गरेको हो ।