सिड्नीमा एकसाता लामो लकडाउन, डेल्टा प्रजातिको कोरोना फैलिएपछि प्रतिबन्धहरु लागू

अष्ट्रेलिया । कोभिड-१९ संक्रमणमा वृद्धि भएपछि अष्ट्रेलियाको सिड्नी सहरमा लकडाउन लागू गरिएको छ । बीबीसीका अनुसार मध्य सिड्नी र बन्डी सामुन्द्रिक तटसहित पूर्वी क्षेत्रमा निषेधाज्ञा लगाइएको हो ।

गत डिसेम्बयता सिड्नीमा लकडाउन लागू भएको हो । निकै संक्रामक मानिएको कोरोनाको डेल्टा प्रजाति भेटिएपछि अष्ट्रेलियाले भाइरस नियन्त्रणका लागि संघर्ष गरिरहेको छ ।

शुक्रबार मात्र १७ नयाँ केस पहिचान भएका छन् । सिड्नीमा कूल ६५ केस पुष्टि भएको छ । सर्वसाधारणलाई घरमै बस्न भनिएको छ ।

‘हामी यो परिस्थितीलाई हप्तौं लामो समयसम्म लम्बिएको हेर्न चाहँदैनौं । हामी यो परिस्थिती ढिलोचाँडो सुधारिएको हेर्न चाहन्छौं’ न्यू साउथ वेल्स राज्यका प्रमुख ग्लाडिज बे्रजेकिलानले भनिन् ।

सबै राज्यमा लकडाउन गर्नुभन्दा संक्रमण बढी देखिएका ठाउँमा मात्र लकडाउन गर्ने तयारी रहेको उनले जनाइन् । जुलाई २ सम्म रहने लकडाउनमा मानिसहरुले आगामी शनिबारदेखि अत्यावश्यक काममा बाहेक घरबाहिर निस्कन पाउने छैनन् ।

सिड्नीबासीलाई अहिले सहर छाड्न रोक लगाइएको छ । अन्य अष्ट्रेलियाली सहर र राज्यमा सिड्नीबाट भ्रमण गर्न प्रतिबन्ध लगाइएको छ । गत डिसेम्बर यता सिड्नी उच्च दरमा संक्रमण वृद्धि भएको छ ।