ओलीको टिप्पणी- प्रचण्ड ‘छेपारो’ जस्तो (भिडियाे)

काठमाडौं । प्रधानमन्त्री केपी शर्मा ओलीले नेकपा माओवादी केन्द्रका अध्यक्ष पुष्पकमल दाहालले सिद्धान्तको नभइ अवसरवादी स्वार्थको राजनीतिमा लागेको टिप्पणी गरेका छन् ।

लोकतान्त्रिक शासन प्रणालीविरुद्ध नै शसस्त्र युद्ध गरेर ठूलो मानवीय क्षति पुर्‍याएका प्रचण्डले कहिले गणतन्त्र आफूले ल्याएको त कहिले गणतन्त्रभन्दा राजा नै राम्रो भन्दै हिँडेको ओलीले बताए । दाहालले छेपारोले जस्तो गरी स्वार्थ र परिवेश अनुसार धारणा बदल्दै हिँडेको आरोप लगाए ।

ओलीले भने, ‘प्रचण्डले अस्ति राष्ट्रपति भन्दा त राजै राम्रो के के भने क्यार .. मान्छेले छक्क माने । किन छक्क मान्ने छेपारोले रंग एकएकछिनमा फेर्छ त । खैरो मुढामा गयो भने खैरो खैरो खालको रंग बनाउँछ । अर्को हरियोमा गयो भने हरियो हरियो रंग बनाउँछ । अलि कालो बोक्रो भएको ठाउँमा पुग्यो भने कालोकालो बनाउँछ । छेपारोले रंग फेर्छ त । कहिले कम्फर्टेबल सरकार बनाइदिन्छु भन्छ कहिले यस्तो हुँदा पनि हाम्रा लोकतान्त्रिक छिमेकीहरू के हेरेर बसेका छन् ? किन हस्तक्षेप गर्देनन् भन्छ । कहिले गणतन्त्र ल्याउने मै हुँ भन्छ । कहिले गणतन्त्रभन्दा त राजतन्त्रै राम्रो भन्न पुग्छ । कहिले विदेशबाट हतियार ल्याएर नेपाली जनताको नरसंहार गर्छ । ‘

प्रधानमन्त्री ओलीले नेकपा माओवादी केन्द्रका अध्यक्ष दाहाल ‘निलवर्ण संघार’ कथाको पात्रजस्तो चरित्र भएको दावी गरे । प्रचण्डको काम नै देशलाई बर्बाद गर्ने भएको भन्दै उनले प्रचण्डलाई पनि पृथकतावादीलाई राजनीतिको मूलधारमा ल्याएजस्तै लोकतान्त्रिक मार्गलाई ल्याउन जरुरी रहेको बताए ।