नारायणगढ–मुग्लिन सडकखण्डमा दर्जन बढी पहिरो, सडक खुलाउन दिनभर लाग्ने

चितवन । एक दर्जन बढी ठाउँमा पहिरो खसेपछि नारायणगढ–मुग्लिन सडक अवरुद्ध भएकाे छ । पानीपर्ने क्रम नरोकिएकाले धेरै ठाउँमा पहिरो खस्न थालेको जिल्ला प्रहरी कार्यालय चितवनले जनाएको छ । अहिले पाँचकिलो र चार किलोमा खसेको ठूला पहिरो हटाउन ३ वटा डोजर प्रयोग गरिएको छ ।

चितवन प्रहरीका प्रवक्ता तथा प्रहरी नायव उपरीक्षक सूर्यबहादुर थापाले अवरोध हटाउन कम्तिमा आज दिनभर लाग्नसक्ने बताए । ‘एक दर्जन ठाउँमा पहिरो खसेको अनुमान छ, सबै ठाउँमा प्रहरी पुग्न पनि सकेको छैन’, उनले भने, ‘निरन्तर वर्षा भएमा पहिरो हटाउन काममा अवरोध आउन सक्छ ।’

आज बिहान २ बजेदेखि पहिरो खस्न सुरु भएको थियो ।