सुदूरपश्चिम प्रदेश : अर्थमन्त्रीको कुलदेवता मन्दिरलाई १ करोड

कैलाली । सुदूरपश्चिम प्रदेश सरकारले आगामी आर्थिक वर्षको बजेटमा मन्दिर निर्माणका लागि १९ करोडभन्दा बढी बजेट विनियोजन गरेको छ ।

सोही क्रममा प्रदेश आर्थिक मामिला तथा योजना मन्त्री प्रकाशबहादुर शाहले आफ्नो कुलदेवताको मन्दिरमा पनि बजेट विनियोजन गरेका छन् । बाजुराको खप्तड छेडेदेह गाउँपालिका-४ मा रहेको ज्यूलेख मन्दिर निर्माणका लागि एक करोड रूपैयाँ विनियोजन गरिएको हो ।

सुदूरपश्चिम सरकारले अगामी आर्थिक वर्ष २०७८/७९ का लागि एक सय ७२ वटा मन्दिर, चर्च र गुम्बा निर्माण गर्न १६ करोड ७२ लाख बजेट विनियोजन भएको छ । जसमा एउटा चर्च, तीनवटा गुम्बा र बाँकी सबै मन्दिर छन् ।

उद्योग पर्यटन वन तथा वातावरण मन्त्रालयले पर्यटन क्षेत्रमा विनियोजन गरेको बजेटको झन्डै एक तिहाइ बजेट धार्मिक संस्थामा दिइएको छ ।