डेब्यूको दशकपछि हेन्डर्सनले गरे पहिलो अन्तर्राष्ट्रिय गोल

काठमाडौं । एक दशकमा ६० भन्दा धेरै खेल खेलिसकेका इङ्लिस मिडफिल्डर जोर्डन हेन्डर्सनले पहिलो अन्तर्राष्ट्रिय गोल गरेका छन् । युरो २०२० को क्‍वार्टरफाइनलमा शनिबार राति भएको युक्रेनविरुद्धको खेलमा चौथो गोल गरेका हेन्डर्सनले अन्तर्राष्ट्रिय फुटबलमा गरेको पहिलो गोल हो ।

लिभरपुलका ३१ वर्षीय कप्तान हेन्डर्सनले म्यासन माउन्टले प्रहार गरेको कर्नरलाई हेडरमार्फत् गोलमा परिणत गरेका थिए ।

‘यो मेरालागि एकदमै विशेष क्षण हो । मैले यसका लागि धेरै प्रतीक्षा गरेको छु,’ हेन्डर्सनले भने, ‘युरोपियन च्याम्पियनसिपको क्‍वार्टरफाइनलमा पहिलो गोल गर्नु नराम्रो कुरा होइन ।’

हेन्डर्सनले सन् २०१० मा इङ्लिस टोलीमा डेब्यू गरेका थिए । हेन्डरसनको युक्रेनविरुद्धको खेल इङ्ल्यान्डका लागि ६२औं खेल थियो । सुरुआती ११ मा नपरे पनि ५७औं मिनेटमा डेक्लान राइसको स्थानमा मैदान प्रवेश गरेका हेन्डर्सन ६ मिनेट नबित्दै गोल गरेका थिए ।