बेल्जियन फुटबलको उपाधिविहीन ‘गोल्डेन जेनेरेसन’
नेपाल प्रेस
२०७८ असार २१ गते ८:०२
काठमाडौं । युरो २०२० को क्वार्टरफाइनलमा इटालीसँग पराजित हुँदै प्रतियोगिताबाट बाहिरिएसँगै बेल्जियन समर्थक फेरि एक पटक निराश बने । प्रतियोगितामा बलिया देशहरूसँग परेको बेल्जियमले साविक विजेतालाई पराजित गर्दै क्वार्टरफाइनल यात्रा तय गरेको थियो ।
View this post on Instagram
तर, उत्कृष्ट फर्ममा रहेको इटालीसँग पराजित भएसँगै विश्व बरियताको शीर्ष स्थानको बेल्जियम सेमिफाइनलसम्म पनि पुग्न सकेन । बेल्जियन फुटबलको गोल्डेन जेनेरेसनका लागि अब विश्वकप २०२२ मा पहिलो उपाधि जित्ने ठूलो मौका हुन सक्छ ।
प्रमुख खेलाडीहरू बिदा हुँदैछन्
बेल्जियन गोल्डेन जेनेरेसनका लगभग सबै खेलाडी बिदा हुने अवस्थामा छन् । फुटबलमा प्राय ३० वर्ष कटेपछि खेलाडीहरूले अन्तर्राष्ट्रिय फुटबलबाट सन्यास लिने गरेका छन् । र, केही बेल्जियम फुटलबरले विश्वकप २०१८ पछि सन्यास पनि लिइसकेका छन् । म्यारोन फेलानी, मोसा डेम्बेले भिन्सेन्ट कम्पनीलगायतका खेलाडीले विश्वकप २०१८ को सेमिफाइनबाट बेल्जियम बाहिरिएपछि सन्यास लिएका थिए । आफ्नो समयका उत्कृष्ट यी खेलाडीले पनि राष्ट्रिय टोलीबाट केही हासिल गर्न सकेनन् ।
क्वार्टरफाइनलबाट बाहिरिनु जति दु:खद् देखिएको छ, त्यो भन्दा दु:खद् खेलाडीले घर फर्किँदै गर्दा महसुस गर्नेछन् । किनभने, बेल्जियन टोलीबाट यो प्रतियोगिता खेलेका थोमस भर्मालेन ३५ वर्ष पुगिसकेका छन् । र, सम्भवत बेल्जियमबाट यो उनको अन्तिम प्रतियोगिता हो ।
त्यस्तै यान भेट्रोङ्घन ३४ वर्ष पुगिसकेका छन् र टोलीमा आफ्नो स्थान बनाउन सक्छन् भन्नेमा विश्वस्त हुन सकिँदैन । टोबी अल्डरविरल्ड पनि ३२ वर्ष पुगिसके र केही वर्षमा सन्यास लिन सक्छन् ।
फरवार्ड द्रृइस मर्टेन्स ३४, मिडफिल्डर अलेक्स विट्सेल ३२ र कप्तान इडेन हाजार्ड ३० वर्ष पुगिसके । हाजार्ड पछिल्लो समयमा चोटले गाँजिएका छन् र उच्च स्तरमा आफ्नो सतप्रतिशत प्रदर्शन दिन सकिरहेका छैनन् । शानदार प्रदर्शन गरिरहेका विट्सेलको भने २०२२ विश्वकप अन्तिम खेल हुनसक्छ ।
टोलीका स्टार खेलाडीहरू केभिन डी ब्रुयना, रोमेलु लुकाकु र टिबाउट क्वर्टुवाको हकमा पनि धेरै समय बाँकी देखिँदैन । डी ब्रुयना र क्वर्टुवा करिब ३० वर्ष पुगिसके र उनीहरूका लागि २०२२ विश्वकप अन्तर्राष्ट्रिय उपाधि उचाल्ने अन्तिम मौका हुन सक्छ ।
View this post on Instagram
४-५ वर्षसम्म बेल्जियमको यो गोल्डेन जेनेरेसनमा लुकाकुले मात्रै सधैँ एकनास प्रदर्शन दिइरहेका हुन सक्छन् । तर, लुकाकुले एक्लैले चार वर्षपछि युरो जिताउने कुरामा विश्वस्त हुन सकिँदैन । त्यसैले यो टोलीसँग २०२२ विश्वकप अन्तिम मौका हो ।
बेल्जियमको पछिल्लो इतिहास
बेल्जियम मात्रै त्यस्तो देश हो, जसले विश्व बरियताको शीर्ष स्थानमा रहेकै बेला चार ठूला प्रतियोगिता (विश्वकप र युरो) खेलेर पनि उपाधि जित्न सकेको छैन । २०१८ विश्वकपको सेमिफाइनलमा पुगेको बेल्जियमले अन्तत: केही जित्ने अनुमान गरिएको थियो । तर, सेमिफाइनलमा फ्रान्ससँग पराजित भएसँगै कास्य पदक झुन्ड्याएर तेस्रो हुँदै घर फर्किनु परेको थियो ।
२०१६ को युरोमा अहिलेको गोल्डेन जेनेरेसन साँच्चै उत्कृष्ट फर्ममा थियो । र, युरो २०१६ को उपाधि दाबेदार मानिएको थियो । तर, क्वार्टरफाइनलमा औसत वेल्ससँग पराजित भएसँगै गोल्डेन जेनेरेसन ‘जिरो’ उपलब्धिमा सीमित भएको थियो ।
२०१२ युरो र २०१४ विश्कपमा क्वार्टरफाइनलसम्म पनि पुग्न नसेको बेल्जियम २०१८ मा विश्वकप जित्न अघि बढेको थियो । तर, सेमिफाइनलको पराजयसँगै फेरि गोल्डेन जेनेरेसन खाली हात भयो ।
अन्तत: विगतलाई अगाडि बढ्न अब बेल्जियन टोलीमा पुनर्संगठन आवश्यक छ । बेल्जियमले केही खेलाडीलाई कहिले राष्ट्रिय टोली भित्र त कहिले बाहिर गरिरहेको छ । अब त्यसरी नचल्ने देखिन्छ । बेल्जियमको लिग खेलिरहेका केही उत्कृष्ट युवा खेलाडी छन्, तर उनीहरूले अहिलेसम्म राष्ट्रिय टोलीमा मौका पाएका छैनन् ।
यदि बेल्जियमले साँच्चै आगामी दिनमा अन्तर्राष्ट्रिय उपाधि जित्ने लक्ष्य राख्ने हो भने ती खेलाडीलाई अब टोलीमा ल्याएर स्टार खेलाडीसँग खेलाउनु आवश्यक छ । हामीले युरो २०२० मा पनि बेल्जियन टोलीमा उदीयमान युवा खेलाडीको कमी एकदमै महसुस भयो । विश्वकप २०२२ मा पनि बेल्जियमले केही हासिल गर्न सकेन भने गोल्डेन जेनेरेसनले अन्तर्राष्ट्रिय फुटबलबाट निराशाबाहेक केही पनि हासिल गर्न सक्ने छैनन् ।
एजेन्सीबाट
नेपाल प्रेस
प्रकाशित: २०७८ असार २१ गते ८:०२
प्रतिक्रिया
सम्बन्धित खवर
