चेक रिपब्लिकका कप्तान डेरिडाले लिए अन्तर्राष्ट्रिय फुटबलबाट सन्यास

काठमाडौं । युरो २०२० को क्‍वार्टरफाइनलबाट बाहिरिएसँगै चेक रिपब्लिकका कप्तान भ्लादिमिर डेरिडाले अन्तर्राष्ट्रिय फुटबलबाट सन्यास लिएका छन् । हेर्था बर्लिनका ३० वर्षीय प्लेमेकर डेरिडाले अन्तिम १६ मा नेदरल्यान्ड्सविरुद्धको खेल चोटका कारण गुमाएका थिए ।

त्यस्तै, क्‍वार्टरफाइनलमा डेनमार्कसँग २-१ गोलको नतिजामा चेक टोली पराजित हुँदा सब्स्टिच्युट खेलाडीको रूपमा डेरिडा मैदान प्रवेश गरेका थिए । सन् २०१२ मा इज्रायलविरुद्धको वार्मअप खेलमा डेब्यू गरेका डेरिडाले चेक टोलीबाट ७६ खेलमा ८ गोल गरेका छन् ।

‘राष्ट्रिय टोलीबाट मैले करियरमा विशेष क्षणहरू बिताएको छु,’ डेरिडाले भने, ‘म अब मेरो धेरै समय परिवार र सानो छोरासँग बिताउन चाहन्छु ।’