सिटौलाको सन्देश : फैसला जे आएपनि मुलुक निर्वाचनमा जान्छ

काठमाडौं । नेपाली कांग्रेसका नेता कृष्णप्रसाद सिटौला नेपाली राजनीतिका परिपक्व ‘खेलाडी’ मानिन्छन् । पार्टी र सरकारको मूल नेतृत्वमा नपुगेपनि राजनीतिको केन्द्रमा छाइराख्न सिटौला माहिर छन् ।

नेपाली कांग्रेसका तत्काली सभापति गिरिजाप्रसाद कोइरालाको विश्वासपात्रका रुपमा लोकतन्त्र प्राप्तिपछि गृहमन्त्री बनेका सिटौलाले नै गणतन्त्र स्थापनाका लागि ‘राजाले नारायणहिटी छाड्ने’ चाँजोपाँचो मिलाएका थिए । कांग्रेसको १२ औं महाधिवेशनपछि तत्कालीन सभापति सुशिल कोइरालाले सिटौलालाई पार्टीको महामन्त्री नै मनोनित गरे । दोस्रो संविधानसभामा संविधान मस्यौदा समितिको सभापतिका रुपमा सिटौलाले नै संघीय लोकतान्त्रिक गणतन्त्र नेपालको संविधानको ड्राफ्ट लेखेका थिए । राष्ट्रिय राजनीतिका महत्वपूर्ण र ऐतिहासिक घटनामा निर्णायक भूमिका देखिएका सिटौला कांग्रेसभित्र पनि निर्णायक पोजिसनमा छन् ।

१३ औं महाधिवेशनमा कांग्रेसभित्रको परम्परागत २ गुटको रस्साकस्सी अन्त्य गराउँदै सिटौलाले तेस्रो समूह निर्माण गरे । सभापतिमा प्रतिस्पर्धा मात्रै गरेनन्, दोस्रो चरणको निर्वाचन अगावै देउवालाई समर्थन पनि दिए । सिटौलाको निर्णायक समर्थनपछि शेरबहादुर देउवा कांग्रेस सभापति बने । त्यसयता तेस्रो धार भनिने आफू नेतृत्वको समूहलाई पार्टीभित्र स्थापित गराउन र भागबण्डा लिन उनी सफल भए । नेपाल विद्यार्थी संघ र महिला संघमा देउवासंग मिलेर अत्यधिक लाभ लिन सफल सिटौलाको समूहले तरुण दलमा पनि उपाध्यक्ष पायो । माओवादीसंगको गठबन्धन सरकारमा सिटौला टिमबाट भीमसेनदास प्रधान रक्षामन्त्री बने भने गगन थापा स्वास्थ्य मन्त्री बने । नेविसंघको पुनर्गठनमा पनि २ महामन्त्रीसहित सिटौलाले आफ्नो समूहको सम्मानजनक उपस्थिति गराएकै छन् ।

यसरी पार्टीको संरचनादेखि सरकारसम्म जोगाएर ल्याएको सिटौलाको ‘तेस्रो धार’ फेरी निर्णायक अवस्थामा छ । कांग्रेसको १४ औं महाधिवेशनमा यो समूहले लिने निर्णयले परिणाममा असर पार्ने निश्चित छ । यहीकारण सिटौलाले पछिल्लो समय समूहगत छलफल र भेलालाई तीव्रता दिएका छन् ।

बत्तीसपुतलीमा चुनावी चर्चा

कांग्रेसको महाधिवेशन र राष्ट्रिय राजनीतिका विषयमा मंगलबार आफ्नो समूहका नेता कार्यकर्ताहरुसंग सिटौला खुलेर प्रस्तुत भए । बत्तीस पुतलीस्थि सम्पर्क कार्यालयमा ५० बढी नेता कार्यकर्तासंग सिटौलाले पार्टी महाधिवेशनको विषयमा मात्रै छलफल गरेन्न, राष्ट्रिय राजनीति बारे भविष्यवाणी समेत गरे । प्रतिनिधिसभा विघटनपछि उत्पन्न राजनीतिक परिस्थितिबारे आफ्नो विश्लेषण सुनाउने क्रममा सिटौलाले मुलुक निर्वाचनमा गइसकेको बताए । ‘सर्वोच्चको आदेश जे आएपछि मुलुक निर्वाचनमा जानेछ । जस्तोसुकै आदेश आएपनि राजनीति चुनावतिर अग्रसर छ । महाधिवेशनसंगै चुनावको तयारी पनि हामीले गर्नुपर्छ’ सिटौलाले भने । उनले अदालतले प्रतिनिधिसभा विघटन सदर गरे सोझै निर्वाचन, देउवालाई प्रधानमन्त्री घोषणा गरे विश्वासको मत निश्चित नदेखिएका कारण निर्वाचन र संसदलाई नै अधिकार दिएपनि वैकल्पिक सरकार गठनमा बाधा पुगेर निर्वाचनमा जानुको विकल्प नरहेको बताए । ‘चुनाव हुनेवाला छ । ग्राउण्डमा धेरै झगडा नगरौं,पछि चुनाव लड्दा अन्तर्घात नहोस्’, सिटौलाको भनाई थियो । नेकपा एमालेमा एकता प्रयास सकरात्मक ढंगले अगाडि बढेकोले अदालतको आदेशपछि ओलीको सरकार रहँदा वा देउवाको सरकार बन्दापनि विश्वासको मत पाउन असहज हुने सिटौंलाको आँकलन छ ।

बाली लगाउने हो, मिलाएर आउनु

भेलामा सहभागि अधिकांश कार्यकर्ताले आसन्न महाधिवेशनबारे चासो राखे । ‘तपाईं सभापतिको उम्मेदवार हो कि होइन ? हाम्रो समूहले महाधिवेशनमा कसरी जान्छ ?’ अधिकांशको जिज्ञासा थियो । जवाफमा सिटौलाले भूमिका बाँधेर जवाफ दिए । ‘कुनैपनि किसानले खेतबारी जोत्छ, डल्लो फुटाउँछ र जमीन रोप्नका लागि तयारी गर्छ भने त्यो किसानलाई बाली लाउने होकि होइन भनेर सोधिरहन जरुरी छैन । तपाईंहरु यत्ति बुझ्नुस्, अगाडि बढ्नुस्’, सिटौलाले भने । उनले क्रियाशील सदस्यता विवाद टुंगिएपछि तयारी अझ बढ्ने र स्थानीय अधिवेशन सकिएपछि टिम नै तयार हुने बताए । कार्यकर्तालाई तल्लो अधिवेशनमा जोसंग मिल्दा प्रतिनिधि जितिन्छ उसैसंग मिल्नपनि सिटौलाले निर्देशन दिए । ‘तल धेरै झैझगडा गर्नुपर्दैन । जोसंग मिल्दा हामी जित्छौं उसैसंग मिलेर प्रतिनिधी आउनस् । बाँकी कुरा त्यसपछि हुन्छ’, सिटौलाको भनाई थियो ।

भेलामा सिटौला समूहका नेताहरु उमाकान्त चौधरी, शिवप्रसाद हुमागाँई , भीमसेनदास प्रधान, महिला संघकी महासचिव धना खतिवडा, गण्डकी प्रदेशसभा सदस्य प्रकाशचन्द्र दवाडी, पूर्व सभाषद चन्द्र महर्जन, युवा नेता कुन्दन काफ्ले, तरुण दल उपाध्यक्ष उत्तम चापागाई, नेविसंघ महामन्त्री बलदेव तिमिल्सिना लगायतका नेताहरुको उपस्थिति रहेको थियो ।