अर्जेन्टिनाको जितका नायक मेस्सी होइन मार्टिनेज

काठमाडौं । दक्षिण अमेरिकाको एक आम मामुली देश हो, अर्जेन्टिना । तर, विश्वभर अर्जेन्टिनालाई दक्षिण अमेरिकाको एक मामुली देशको रूपमा कमैले मात्रै चिन्छन् । अर्जेन्टिनालाई विश्वमा चिनाउने प्रमुख कुरा त फुटबल हो । अझ भनौं कप्तान लियोनेल मेस्सी हुन् ।

विश्व फुटबलको सबैभन्दा प्रतिष्ठित अवार्ड बालोन डी’अर ६ पटक जितेका मेसी एक औसत फुटलबर होइनन्, उनी विश्व फुटलबकै सर्वोत्कृष्ट मध्येका एक खेलाडी हुन् । मेस्सी फुटबलर मात्रै होइनन्, उनी धेरैका प्रेरणाका स्रोत हुन्, आकर्षणको केन्द्र हुन्, र धेरै समर्थकका लागि फुटबलको पर्याय हुन् । अर्जेन्टिनी तथा बार्सिलोनाका सुपर–स्टार फरवार्ड मेसीको उपस्थिति नै कुनै प्रतियोगिताको मूल्य र औचित्यमा आकाश-पातालको फरक पार्छ ।

मेस्सीको उपस्थितिले मात्र विपक्षीलाई १० पटक सोच्न बाध्य मात्रै बनाउँदैन, आफ्नो टोलीको आत्मविश्वासलाई पनि शिखरमा पुर्‍याउँछ । र, अहिले ब्राजिलमा जारी कोपा अमेरिका २०२१ मा उनै मेस्सीको टोली फाइनलसम्म पुगेको छ । र, आइतबार हुने उपाधि भिडन्तमा अर्जेन्टिनाले घरेलु टोलीको सामना गर्नेछ ।

अर्जेन्टिनाको फाइनल यात्रामा पनि सदाझैँ कप्तान मेस्सीको भूमिका उल्लेखनीय छ । जारी प्रतियोगितामा चार गोल गरिसकेका मेस्सी बुधबार बिहान भएको कोलम्बियाविरुद्धको सेमिफाइनलमा पनि अर्जेन्टिनी टोलीका नायक बन्ने सबैको अपेक्षा थियो । तर, निर्धारित समयको खेल १–१ गोलको बराबरीमा सकिएसँगै नजिता पेनाल्टी सुटआउटमा अल्झियो । परिस्थिति बदलियो र खेलको जिम्मेवारीको मात्रा पनि मार्टिनेजमाथि थपियो । त्यहाँ मेस्सीसहितका बाँकी टोलीको भूमिका आधा र गोलकिपर इमिलियानो मार्टिनेजको भूमिका आधा हुन्थ्यो । अर्जेन्टिनी टोलीमा क्षमतावान् खेलाडीको कुनै कमी छैन । तर, मेस्सीको उत्कृष्टतासामू औसत खेलाडीको गन्ती त्यति हुँदैन ।

तर,  कोलम्बियाविरुद्ध अर्जेन्टिनाको जितमा नायक बन्ने मौका परिस्थितिले गोलकिपर मार्टिनेजसामू सिर्जना गरिदिएको थियो । र, मार्टिनेजले सोही मौका सदुपयोग गर्दै २०१६ पछि पहिलो पटक ठूला प्रतियोगितामा अर्जेन्टिनाले फाइनल यात्रा तय गर्दाका नायक बने । स्टार खेलाडीको उपस्थिति औसत खेलाडीका लागि प्रेरणा र चुनौती दुवै बन्ने गर्छ । तर, चाहे जे होस्, कोलम्बियाका तीन खेलाडीले प्रहार गरेको पेनाल्टी रोकेका मार्टिनेज अर्जेन्टिनाको जितका बास्तविक नायक बने । स्टार मेस्सीको उत्कृष्ट प्रदर्शन कुरिरहेका दर्शकले मार्टिनेजले निर्बाह गरेको नायकत्वको आनन्द लिए ।

को हुन् मार्टिनेज ?

आधुनिक फुटबलको सबैभन्दा प्रसिद्ध राष्ट्रिय लिग– इङ्लिस प्रिमियर लिगमा व्यावसायिक फुटबल खेल्दै आएका मार्टिनेजले गत महिना मात्रै अर्जेन्टिनी राष्ट्रिय टोलीबाट डेब्यू गरेका थिए । एस्टोन भिल्लाबाट गत सिजन १५ क्लिनसिट राखेका मार्टिनेजले गत जुनमा विश्वकप छनोट अन्तर्गत चिलीविरुद्धको खेलमा राष्ट्रिय टोलीबाट डेब्यू गरेका थिए । प्रतिस्पर्धात्मक खेलमा भने मार्टिनेजले जारी कोपाकै पहिलो खेलमा उही चिलीविरुद्ध डेब्यू गरेका हुन् ।

सन् २०१२ मा आर्सनलको युवा टोलीबाट सिनियर टोलीमा उदाएका मार्टिनेजले सात वर्ष विभिन्न क्लबहरूमा लोनमा बिताए । आर्सनल बसाइ २०१९ मा टुङ्ग्याएका अर्जेन्टिनी २८ वर्षीय गोलकिपर मार्टिनेजले २०२० देखि एस्टोन भिलाको गोलपोस्ट सम्हालिरहेका छन् । उनले आर्सनल छाडेकै वर्ष एस्टोन भिल्लाबाट डेब्यू गर्दा २०२० को सेप्टेम्बरमा शेफिल्ड युनाइटेडविरुद्ध पेनाल्टी रोकेका थिए ।

आर्सनलबाट २ करोड पाउन्डमा एस्टोन भिल्ला पुगेका मार्टिनेजले डेब्यूमै गरेको प्रदर्शनबाट फुटबलप्रेमीको ध्यान आफूतर्फ आकर्षित गरेका थिए । भिल्लाबाट दिइरहेको उत्कृष्ट प्रदर्शनको उपलब्धी राष्ट्रिय टोलीको पहिलो रोजाईको गोलकिपरका रूपमा पाए । र, त्यो उपलब्धीलाई अवसरमा ढालेका मार्टिनेज आजको खेलमा नायक बनेसँगै विश्व फुटलबम उदाएका छन् । स्थापित भएका छन् ।

आजको खेलपछि कप्तान मेसीले मुक्त कण्ठले मार्टिनेजको प्रशंसा गर्दै भनेका छन्– हामीसँग इमी (इमिलियानो मार्टिनेज) छन्, र उनी ‘फेनोमेनन’ छन् । हामीले उनलाई विश्वास गर्‍याैं र सबै खेल खेल्ने हामीले लक्ष्य हासिल गर्‍याैं । अब हामी फाइनलका लागि जाँदैछौैँ ।’

मार्टिनेज आफैँले पनि खेलपछि निःशब्द भएको प्रतिक्रिया दिए ।

‘म निःशब्द छु,’ उनले भने, ‘उनीहरूले हामीलाई पेनाल्टीसम्म पुर्‍याए । पेनाल्टीमा भाग्यको पनि कुरा हुन्छ, आज मेरो खुशी हुने दिन थियो ।’