सञ्चार विधेयक सच्याउन लुम्बिनी प्रदेश तयार

रुपन्देही । लुम्बिनी प्रदेश सरकारले प्रदेशसभामा दर्ता भएको सञ्चार विद्येयकमा भएका कमजोरी सच्याउन तयार भएको बताएको छ ।

विधेयकका विषयमा भएका आन्दोलन र असहमतिलाई सम्बोधन गर्दै प्रदेश सरकारले प्रदेशसभामा पेश भएको विद्येयकमा रहेका कमजोरीहरु बारे बुँदागत रुपमा छलफल गर्न तयार भएको जनाएको हो ।

सरकारका प्रवक्तासमेत रहेका आर्थिक मामिला तथा योजना मन्त्री बैजनाथ चौधरीले प्रेस स्वतन्त्रतालाई कुण्ठित गर्ने पक्षमा प्रदेश सरकार नरहेको तथा केही कमजोरीहरु छन् भने पनि त्यसलाई सच्याउन तयार रहेको उल्लेख गरे । संसदमा प्रस्तुत सञ्चार विधेयकमा सुधार गर्नुपर्ने कुराहरु बुँदागत रुपमा लेखेर आउन पत्रकार महासंघलाई आग्रह गर्दै उनले छलफलबाट सच्याउन तयार रहेको स्पष्ट पारेका हुन् ।

मन्त्री चौधरीले वास्तविक तथा व्यवसायिक पत्रकाहरुले आफ्नो पेसाबाट जीविकोपार्जन गर्नसक्ने अवस्था नरहेको भन्दै यसका लागि सरकारले सहयोग पुग्नेगरी नीतिहरु ल्याउन तयार रहेको उल्लेख गरे । लुम्बिनी प्रदेश सरकारले आन्तरिक मामिला तथा कानून मन्त्रालयले आयोजना गरेको कार्यक्रममा उनले यस्तो बताएका हुन् ।

आन्तरिक मामिला तथा कानून मन्त्री चेतनारायण आचार्यले सञ्चार विधेयकमा भएका कमजोरीहरु सच्याउनका लागि सरकारले प्रतिवद्धता जनाएपनि पत्रकार महासंघ आन्दोलनमा गएकोप्रति असन्तुष्टि व्यक्त गरे ।

विषयवस्तुलाई अतिरञ्जित बनाएर अनावश्यक विरोधमा नआउन आग्रह गर्दै उनले विधेयमा भएका कमजोरीहरुलाई बुँदागत रुपमा लफल गरी सच्याउन सकिने कुरालाई दोहो¥याए । प्रदेश सरकारले संघीय कानूनभन्दा पृथक रहेर जान नसक्ने बताउँदै उनले पत्रकार महासंघलाई विधेयकमा भएका त्रुटिहरु सच्याउनका लागि मुर्त रुपमा छलफल गर्ने गरी आउन आग्रह समेत गरे ।

आफू मन्त्री हुनुभन्दा पहिले नै मन्त्रिपरिषदले निर्णय गरिसकेको विधेयक फिर्ता लिन नमिल्ने बताउँदै उनले त्यसमा भएका कमजोरीहरुलाई सच्याउनका लागि आफू तथा सरकार तयार रहेको स्पष्ट पारे ।

नेपाल पत्रकार महासंघ रुपन्देहीका अध्यक्ष रामराज पोखरेलले सञ्चार विधेयकमा भएका मजोरीहरुलाई सच्याएर स्वतन्त्र प्रेसलाई बचाइराख्न सरकारसँग आग्रह गरे । प्रेस स्वतन्त्रता माथि अंकुश लगाउने विधेयकप्रति महासंघको विरोध रहेको जनाउँदै उनले लुम्बिनी प्रदेश सरकारद्वारा संसदमा प्रस्तुत सञ्चार विधेयक फिर्ता गरी पुनःलेखन गर्नुपर्ने उल्लेख गरे ।

चौधरीलाई मरणोपरान्त सिर्जनशील पत्रकारिता पुरस्कार

लुम्बिनी प्रदेश सरकारले कोरोना संक्रमणबाट निधन भएका रुपन्देहीका पत्रकार हिक्मत चौधरीलाई सिर्जनशील पत्रकासता पुरस्कारबाट मरणोपरान्त सम्मान गरेको छ ।

मुख्यमन्त्री कार्यालयमा आयोजित कार्यक्रममा चौधरीकी पत्नी उदयदेवी कुँवरलाई ५० हजार राशीको पुरस्कार प्रदान गरिएको छ । अग्रज पत्रकारिता पुरस्कार दाङका ६७ वर्षीय सुशील गौतमले पाएका छन् । सिर्जनशील पत्रकारिता पुरस्कारबाट बाँकेकी अक्षरी पोखरेल र गुल्मीका जनार्दन घिमिरे सम्मानित भए । गौतमले १ लाख र पोखरेल तथा घिमिरेले जनही ५० हजार रुपैयाँ पाएका हुन् ।

प्रदेश सरकारले २ वर्षअघि नै पुरस्कारको घोषणा गरे पनि पहिलोपल्ट वितरण गरिएको हो । पुरस्कार वितरणका लागि पत्रकार रुपन्देहीका पत्रकार डीआर घिमिरेको संयोजकत्वमा विमला चौधरी र केवि घिमिरे सदस्य रहने गरी ३ सदस्यीय छनोट समितिलाई जिम्मा दिएको थियो ।