महामारीले चम्किएन कान्सको बजार, तर रेडकार्पेटमा चम्किए सेलेव्रिटी (तस्विरहरु)

पेरिस । कोरोनाभाइरस महामारी बीचमा पनि अहिले फ्रान्सेली सहर रिभेरियामा विश्वकै ठूलो फिल्म फेस्टिभल चलिरहेको छ । विश्व फिल्मका स्टारहरु रेडकार्पेट नापिरहेका छन् ।

एडम ड्राइभर, म्याट डेमोन, स्पाइक लीसहित विश्व फिल्मका हु इज हुहरु रेडकार्पेटमा देखिएका छन् । गतवर्ष भाइरस महामारीले रोकिएको कान्स यसपटक भने भौतिकरुपमै सुचारु भएको हो ।

स्टारहरु मास्कबिनै रेडकार्पेटमा प्रस्तुत भएका छन् । लियोस क्राक्स निर्देशित ‘एनट्टे’ प्रिमियरसँगै सुरु भएको कान्समा यसपटक विगतजस्तो व्यवसायिक चहलपहल नदेखिएको अन्तर्राष्ट्रिय संचारमाध्यमले जनाएका छन् ।

कान्सको फिल्म बजारमा यसपटक फिल्महरुको राइट विक्री र संयुक्त लगानी कम देखिएको हलिउड रिपोर्टरले जनाएको छ । यसले स्वतन्त्र फिल्महरुको भविष्यमा चुनौति सिर्जना भएको उक्त म्यागजिनले जनाएको छ ।

व्यवसायिक अनिश्चिताको कारण यसपटक कान्सको व्यापार सुस्ताएको छ । मुख्यतः फिल्मका लगानीकर्ताहरु तत्काल सिनेमा घरमा दर्शक फर्कने कुरामा ढुक्क हुन सकेका छैनन् । यद्यपी, महामारीले थलिएको फिल्मलाई लयमा फर्काउन फेस्टिभलको भूमिका महत्वपूर्ण हुने आशा कान्सले लिएको छ । जुलाई १७ सम्म यसपटक कान्स फेस्टिभल संचालन हुनेछ ।