पेनाल्टीमा चुकेका तीन इंग्लिस खेलाडीमाथि रंगभेदी दुर्व्यवहार

एजेन्सी । इंग्ल्याण्डको फुटबल संघले (द एफए)ले युरो २०२० को फाइनलमा पराजित भएपछि इंग्ल्याण्डका खेलाडीहरु मार्कस रासफोर्ड, जाडोन सान्चो र बुकायो साकामाथि भएको रंगभेदी दुर्व्यवहारको भर्त्सना गरेको छ ।

इंग्ल्याण्डले इटलीसँग टाइब्रेकरमा ३-२ ले पराजय व्यहाेर्दा यी तीन खेलाडीले पेनाल्टीमा गोल गर्न असफल भएका थिए ।

लण्डन महानगरीय प्रहरीले यो दुर्व्यवहारको अनुसन्धान गरिरहेको छ । उसले भनेको छ, ‘यो स्वीकार गर्न सकिने घटना होइन ।’ द एफएले खेलाडीमाथिको दुवर्व््यवहारबाट स्तब्ध भएको जनाएको छ ।

रंगभेदी व्यवहारविरुद्धको लडाईमा साथ दिन भन्दै युरो २०२० मा सबै देशका खेलाडीले खेल सुरु हुनुअघि घुँडाले टेकेर समर्थन गर्ने गरेका थिए । इंग्लिस टिमले पनि इटलीविरुद्धको फाइनलहरु त्यही गरेको थियो ।

‘यो व्यवहार कसले गरेको हो भन्नेबारे हामीले यकिन गर्न सकिरहेका छैनौं । तर एउटा कुरा के प्रष्ट हो भने हामी कसैलाई पनि छाड्दैनौं,’ एफएको वक्तव्यमा भनिएको छ, ‘हामी पीडित खेलाडीको सुरक्षाका लागि हरसम्भव प्रयास गर्नेछौं ।’

गएको मे महिनामा म्यानचेस्टर युनाइटेडले युरोपा लिगको फाइनल हारेपछि पनि रासफोर्डमाथि रंगभेदी व्यवहार भएको थियो । गत वर्ष अमेरिकामा एक प्रहरी अधिकारद्वारा काला जातीका जर्ज फ्लोइडको हत्यापछि रंगभेदको विरोधमा उत्रिने खेलाडीमध्ये सान्चो पनि एक थिए ।