कार्यदलका नेताले माधव नेपाललाई सोधे- एकता रोज्ने कि विभाजन ?

काठमाडौं । नेकपा एकता कार्यदलका सदस्यहरूले वरिष्ठ नेता माधवकुमार नेपाललाई पार्टी एकता वा विभाजनमध्ये एक रोज्न सुझाव दिएका छन् । १० बुँदे सहमतिको मस्यौदा नेपाल निवासमै पुगेर बुझाउँदै अब धेरै विवाद नगर्न सुझाव दिएका हुन् ।

नेपालकै कारण एमालेको सरकार ढलेर कांग्रेसको हातमा पुगेको भन्दै अब विवाद बढाए विभाजन हुने भएकाले अध्यक्ष केपी शर्मा ओलीसँग संवाद गरेर एकतामा फर्किन नेताहरूले आग्रह गरेका छन् ।

वार्ता टोलीका संयोजक सुवास नेम्वाङ र विष्णु पौडेलले नेपाललाई भेटेर अब विवाद बढाए विभाजनबाहेक पुग्नका लागि अन्य ठाउँ नरहेको बताएका थिए । आफूहरूले संवादमा फर्किन आग्रह गरेको नेम्वाङले बताए ।

नेपालसँगको भेटमा उपाध्यक्ष भीम रावल पनि सहभागी थिए । नेपालसहित एमालेका २३ सांसदको समर्थनमा देउवा प्रधानमन्त्री नियुक्त भएका छन् ।