मंगलबार २३ सय कोभिड बिरामी थपिए, १२ जनाको मृत्यु

काठमाडौं । पछिल्लो २४ घण्टामा मुलुकमा २,३९८ जना कोरोना संक्रमित थपिएका छन् । ११ हजार १२ नमुना (पीसीआर ७०५८ र एन्टिजेन ३९५४) परीक्षण गर्दा ती संक्रमित थपिएका हुन् ।

मंगलबार कोरोना संक्रमणदर २१.७७ प्रतिशत रहेको स्वास्थ्य मन्त्रालयले जनाएको छ । पछिल्लो २४ घण्टामा थप १२ जनाले ज्यान गुमाएका छन् भने २०७८ जना डिस्चार्ज भएका छन् ।

मंगलबार काठमाडौ उपत्यकामा ५८७ जना संक्रमित थपिएका छन् । जसमध्ये काठमाडौं जिल्लामा ४१०, ललितपुरमा ९७ र भक्तपुरमा ८० जना छन् ।

मोरङ, सुनसरी, झापा, काठमाडौं, भक्तपुर, ललितपुर, चितवन र कास्की ८ जिल्लामा ५०० भन्दा बढी सक्रिय संक्रमित रहेको मन्त्रालयले जनाएको छ ।

मुलुकमा हालसम्म भाइरसबाट संक्रमित हुनेको संख्या ६ लाख ५८ हजार ७७८ जना रहेको छ भने कुल ६ लाख २३ हजार १०५ जना संक्रमणमुक्त भएका छन् ।

अहिलेसम्म मुलुकमा ९,४१२ जनाको मृत्यु भएको तथ्यांकमा उल्लेख गरिएको छ । नेपालमा मंगलबारसम्म कोभिड–१९ विरुद्धको पहिलो मात्राको खोप लगाउनेको संख्या २६ लाख ११ हजार ८०७ जना रहेको छ भने ११ लाख ३ हजार १३० जनाले दोस्रो डोज खोप लगाइसककेका छन् ।