महेश बस्नेत भन्छन्- एक महिनापछि ओली फेरि पुन:स्थापना हुने सम्भावना छ

काठमाडौं । नेकपा एमालेका युवा नेता महेश बस्नेतले एक महिनापछि फेरि केपी ओली सत्तामा पुन:स्थापना हुन सक्ने दावी गरेका छन् । एक महिनाभित्र शेरबहादुर देउवाले विश्वासको मत प्राप्त गर्न नसकेमा ओलीले प्रधानमन्त्रीमा दावी गर्न सक्ने उनको तर्क छ ।

निवर्तमान प्रधानमन्त्री केपी शर्मा ओलीलाई बालुवाटारबाट बालकोटसम्म स्कर्टिङ गर्ने क्रममा बस्नेतले यस्तो बताएका हुन् ।

उनले भने, ‘एक महिनापछि एमाले र जसपा मिलेर ७६ (५) को प्रधानमन्त्रीमा केपी ओलीले दावी गर्न पाउने कि नपाउने ? देउवाको दावीलाई मान्यता दिने अदालते एमाले र राजपाको दावीलाई मान्यता दिन्छ कि दिँदैन ?’ विश्वासको मत नपाएपछि देउवाले पनि निर्वाचन घोषणा गर्ने बस्नेतले बताए ।

‘केपी ओलीले गरेको विघटन सुँगुरको मुखजस्तो अनि देउवाले गर्न सक्ने विघटन चाहिँ मयुरको प्वाँखजस्तो हुन्छ ? अदालत के भन्छ ?’ उनने प्रश्न गरे ।

बस्नेतले भने, ‘एक महिनापछि केपी ओली फेरि पुन:स्थापना हुने सम्भावना छ । तर, यदि जालसाँजी गरियो भने पनि ६ महिनापछि हुने चुनावमा एमालेलाई कसैले छेक्न सक्दैन । एमाले बाघ हो । बाघ र सिंहसँग लड्न स्यालहरूले हुल बाँधेर आउनुपर्छ ।’