लगानीकर्ता खोज्दै तीन नेपाली फिल्म कान्स फेस्टिभलमा

काठमाडौं । विश्वकै ठूलो फिल्म फेस्टिभल कान्स अहिले फ्रान्समा जारी छ । फेस्टिभलकै क्रममा अहिले लगानी र वितरणका लागि आकर्षक मानिने कान्स फिल्म बजार पनि चलिरहेको छ ।

अहिले सातवटा दक्षिण एसियाली फिल्महरु लगानीकर्ता खोज्दै कान्समा पुगेका छन् । जसमध्ये तीनवटा फिल्म नेपालबाट छन् जसमा सुविना श्रेष्ठको देवी, सनिर पाण्डेको ‘नो विन्टर होलिडे’ र पासाङ दावा शेर्पाको ‘कुहिरोपारीको सहर’ छन् ।

देवी र नो विन्टर होलिड डकुमेन्ट्री हुन् भने कुहिरोपारीको सहर फिचर फिल्म हो । अन्य अन्तर्राष्ट्रिय प्रतिस्पर्धा पनि जितेका यी तीनैवटा फिल्मले निर्माण तथा वितरणका लागि लगानीकर्ता खोजेका हुन् ।

जुलाई ६ देखि सुरु भएको कान्स आगामी शनिबार सकिँदैछ । गतवर्ष महामारीको कारण स्थगित भएको कान्स यसपटक भौतिकरुपमा आयोजना भएपनि विगतको जस्तो आकर्षण नदेखिएको हलिउड रिपोर्टर म्यागजिनले उल्लेख गरेको छ ।