भाइरसलाई राजनीतिकरण नगर्न आग्रह गर्दै चीनसहित ४८ देशले लेखे डब्लुएचओलाई पत्र

बेइजिङ । कोरोनाभाइरस उत्पत्तिको विषयलाई राजनीतिकरण नगर्न आग्रह गर्दै ४८ मुलुकले विश्व स्वास्थ्य संगठनलाई पत्र लेखेका छन् । शुक्रबार आयोजित पत्रकार सम्मेलनमा चिनियाँ विदेश मन्त्रालयका प्रवक्ताले सो जानकारी दिएका हुन् ।

यद्यपी, कुन-कुन देशले पत्रमा हस्ताक्षर गरेका हुन् भन्ने कुरा उनले खुलाएनन् । अमेरिका र उसका साझेदार मुलुकहरुले भाइरस उत्पत्तिको निश्पक्ष छानविनमा चीनले सघाउनुपर्ने माग गरिरहँदा चीनको तर्फबाट यस्तो जानकारी प्रकाशमा आएको हो ।

डब्लुएचओ निर्देशक डा. टेड्रोसलाई पठाइएको पत्रमा कोरोनाभाइरस मानव जातीविरुद्धकै साझा दुश्मन भएकाले सबै मिलेर मात्र यसलाई पराजित गर्न सकिने कुरा उल्लेख गरेको ग्लोबल टाइम्सले जनाएको छ ।

चीन र डब्लुएचओको संयुक्त कार्यपत्र अनुसार नै भाइरस पहिचानको दस्तावेज बन्नुपर्ने समेत उल्लेख छ । साथै पत्रमा भाइरसलाई राजनीतिकरण नगर्न र विश्व स्वास्थ्य सम्मेलनको बडापत्र अनुसार अगाडि बढ्न भनिएको छ ।

उक्त पत्रमा ठूलो संख्यामा विकासोन्मुख मुलुकहरुले यसबारे डब्लुएचाओसँग न्याय मागेको दाबी पनि पत्रमा गरिएको छ ।

नेपालले भन्यो : हामीलाई जानकारी छैन

चीनले ४८ मुलुकले पत्रमा हस्ताक्षर गरेको बताएपनि देशको नाम चाहिँ उल्लेख गरेको छैन । नेपालले यसबारे आफूहरुसँग परामर्श नगरिएको र जानकारी नगरिएको बताएको छ । स्वास्थ्य मन्त्रालयका प्रवक्ता डा. कृष्णप्रसाद पौडेलले मन्त्रालयसँग छलफल र परामर्श नगरिएको बताए ।