वामदेवले भने- सांसदलाई ह्वीप लाग्ने शैलीको निर्णय गर्नु गल्ती हुन्छ, स्वविवेकीय अधिकार हुनुपर्छ

काठमाडौं । नेकपा एमालेका उपाध्यक्ष वामदेव गौतमले प्रधानमन्त्री शेरबहादुर देउवालाई विश्वासको मत नदिन ह्वीप लगाउने शैलीले गरेको पार्टीको निर्णय गलत रहेको प्रतिक्रिया दिएका छन् । गौतमले सर्वोच्च अदालतको आदेशबमोजिम सांसदलाई स्ववकीय अधिकार रहेको बताएका छन् ।

गौतमलाई उदृत गर्दै उनका प्रेस संयोजक विश्वमणी सुवेदीले भने, ‘संविधानको धारा ७६(५) बमोजिम मतदान गर्दा ह्वीप नलाग्ने संवैधानिक इजलासको व्याख्या भएपछि ह्वीप लाग्ने निर्णय गर्नु गल्ती हुन्छ । कुनै पनि संस्थाले आफ्ना सदस्यलाई स्वविवेकीय अधिकार दिन्छ भने त्यो उच्चस्तरको लोकतान्त्रिक अभ्यास मानिन्छ ।’

गौतम पछिल्लो स्थायी कमिटी र संसदीय दलको बैठकमा उपस्थित भएका छैनन् । प्रतिनिधिसभामा गौतमनिकट एकजना मात्र सांसद छिन् उनकै पत्नी तुलसा थापा । थापा अहिले ओलम्पिकको सिलसिलामा जापान पुगेकी छन् ।

एमालेले विश्वासको मत नदिन सांसदहरूलाई निर्देशन दिएको छ । देउवालाई विश्वासको मत दिनेहरू एमालेमा नरहने निर्णय स्थायी कमिटीले गरेको छ ।