देउवाले महन्थसँग मागे विश्वासको मत

काठमाडौं । प्रधानमन्त्री शेरबहादुर देउवाले जनता समाजवादी पार्टी (जसपा) नेपालका अध्यक्ष महन्थ ठाकुरसँग विश्वासको मत मागेका छन् । नेपाली कांग्रेसका सभापतिसमेत रहेका प्रधानमन्त्री देउवाले औपचारिक पत्र लेखेरै ठाकुरसँग विश्वासको मत मागेका हुन् ।

जसपाको ठाकुर पक्ष केपी ओली नेतृत्वको सरकारमा सहभागी भएको थियो ।

प्रधानमन्त्री देउवाले लेखेको पत्रमा भूमिका नबाँधी विश्वासको मत मात्रै मागिएको छ । ‘प्रतिनिधिसभाको बैठकमा विश्वासको मत लिने कार्यक्रम रहेकोले उक्त प्रस्तावमा यहाँ र यहाँ सम्वद्ध माननीय सदस्यहरुको तर्फबाट समर्थन गर्न गराईदिनुहुन हार्दिक अनुरोध गर्दछु’ देउवाले ठाकुरलाई पठाएको पत्रमा उल्लेख गरिएको छ ।

देउवाले पत्र पठाएपनि ठाकुरसहितका सांसदहरूले विश्वासको मत नदिने निर्णय गरिसकेका छन् । उनीहरू प्रतिनिधिसभाको जारी बैठकमा प्रतिपक्षको लहरमा बसेका छन् ।