विश्वका सरकारद्वारा १८० पत्रकारको जासूसी गरेको खुलासा, पेगासेस सफ्वेयर प्रयोग गर्दै सूचना ह्याक

काठमाडौं । केही मुलुकका सरकार आफ्नो आलोचना गर्ने पत्रकारको निगरानी गरेको खुलासा भएको छ । इजरायलमा विकास भएको सफ्टवेयर पेगासेसको मद्दतबाट ती पत्रकारको जासुसी गरिएको अन्तर्राष्ट्रिय संचारमाध्यमले जनाएका छन् ।

१६ वटा अन्तर्राष्ट्रिय मिडियाले लामो अध्ययनपछि सार्वजनिक गरेको विवरणमा यस्तो दावी गरिएको छ । विश्वभर १८० संवाददाता र सम्पादकलाई सरकारी निगरानीमा राखिएको समेत उल्लेख छ ।

यस विवरणमा भारत पनि सामेल छ जहाँ प्रधानमन्त्री नरेन्द्र मोदीको आलोचना गर्ने पत्रकारलाई पनि निगरानीमा राखिएको उल्लेख छ । विश्वका विभिन्न स्थानमा पेगासेसका ग्राहकले सरकारको आलोचना गर्ने पत्रकारको निगरानी राखेको कुरा उल्लेख छ ।

एसियादेखि अमेरिकासम्मै सरकारले पेगासेसको माध्यमबाट रिपोर्टरको जासूसी गरेको जनाइएको छ । संसारका केही देशको सूची पनि सामेल छ जहाँ सरकारले पत्रकारलाई निगरानीमा राखेको छ ।

सूचीको पहिलो स्थानमा अजरबैजान छ जहाँ ४८ जना पत्रकार सरकारी निगरानीमा रहेको उल्लेख छ । भारतमा त्यस्ता ३८ जना पत्रकार रहेको दाबी गरिएको छ ।

यो सूची सार्वजनिक हुने वित्तिकै सफ्टवेयर पेगासेस निर्माता कम्पनी एनएसओ ग्रुपले यसलाई आफूविरुद्ध भएको अन्तर्राष्ट्रिय षड्यन्त्र भनेको छ । पेगासेसको माध्यमबाट एसएमएस, ह्वाट्सएप, आई म्यासेज पठाउने गरिन्छ र क्लिक गर्न भनिन्छ ।

सो क्लिक गर्दा स्पाइवेयर एक्टिभ हुनेगर्छ । उक्त सफ्वटेयर एकपटक एक्टिभ हुने वित्तिकै एसएमएस, इमेल, ह्वाट्सएप, च्याट, कन्ट्याक्ट बुक, जीपीएस डेटा, फोटो र भिडिओ लाइब्रेरी र क्यालेन्डरमा सीधै पहुँच स्थापित हुने गर्छ ।