अर्थतन्त्रलाई चलायमान बनाउन कोरोना नियन्त्रण प्रमुख सर्त : प्रधानमन्त्री देउवा

काठमाडौं । प्रधानमन्त्री शेरबहादुर देउवाले आर्थिक क्षेत्रलाई चलायमान बनाउन कोरोना कोरोना नियन्त्रण प्रमुख आवश्यकता रहेको बताएक छन् ।

नेपाल उद्योग परिसंघको १८औं वार्षिक साधारणसभामा उनले भने, ‘कोरोना नियन्त्रणमा लागि निजी क्षेत्रले सहयोग गरेको छ । अब सरकारले कोरोनाविरुद्धको खोप सबैलाई उपलब्ध गराएर देशको अर्थतन्त्रलाई चलायमान बनाउन सहयोग गर्नेछ ।’

नेपाल उद्योग परिसंघका अध्यक्ष सतिशकुमार मोरले देशको अर्थतन्त्र माथि उठाउनका लागि मेक इन नेपाल अभियान शुरू गरेको बताए । मोरले भने, ‘स्वदेशी बस्तु तथा सेवाको उत्पादन प्रवर्द्धन र उपभोग वृद्धि गर्दै आत्मनिर्भर अर्थतन्त्र निर्माणको लागि मेक इन नेपाल अभियानले सहयोग गर्ने छ । अघिल्लो सरकारले पनि मेक इन नेपाल अभियान बजेटमा नै समावेश गरेको र यो सरकारले पनि देशमा नै उत्पादन वृद्धि गर्न सहयोग गर्ने छ ।’

अर्थमन्त्री जनार्दन शर्माले महामारीले थला परेको अर्थतन्त्रलाई अब उत्पादनमूखी अभियान चलाएर उठाउनुपर्ने बताए । मन्त्री शर्माले भने, ‘सरकारले कोरोनाको कारण थला परेका क्षेत्रहरुको लागि राहतको प्याकेज ल्याउँदैछ । त्यसमा तपाईंहरूको केही सुझाव छ भने जानकारी गराउनुस् । सबै मिलेर नै देशको अर्थतन्त्रलाई उत्पादनमूलक बनाउने हो ।’

सांसद तथा उद्योगपति विनोद चौधरीले नेपालले चाहेमा छिमेकी देश भारत र चीनबाट ५० लाख धेरै पर्यटन भित्र्याउन सकिने बताए ।
उनले भने, ‘चौधरी ग्रुपले सञ्चालन गरेको गरिखाने अभियानमा ८०० योजना अगाडि बढेको र अब गरिखाने अभियानलाई सरकारले नै अगाडि बढाउनु पर्नेछ । प्रधानमन्त्री देउवाले नै यो अभियानको शुरू गरेको र अब यसलाई सरकारले नै अगाडि बढाउनुपर्छ । अब यो सरकारको योजना बनोस् ।’